كود احمد الطيب ////
ادريس لشكر الكاتب الاول لحزب الاتحاد الاشتراكي ديما كيضرب على الشعا. كيغمق على الناس باش يخبي رغبتو. رئيس الدولة دار خطاب فعيد العرش. هدر على ضرورة تكون دماء جديدة شبابية قافزة بيديها فالحكومة وفالمؤسسات العمومية. لشكر ناض وقال خاص نجيبو كفاءات للحزب ونديرو قاعدة بيانات.
ظاهريا باش يقولو راه تحرك. لكن هاد الشي الظاهري فالباطن لشكر كيقلب على ما ياخد من هاد الحركة ديال الوزرا والحكومة. وفق مصدر “كود” فان كلا من لحبيب المالكي وقيادي اخر فحزب الوردة كيروجو هاد ليام رسالة مفادها “السي ادريس خاصو يتكافأ”. يعني ان ادريس خاصو ياخد منصب وزير.
هادي طبعا الى وقعات غادية تكون ثورة فالبلاد. ضرب لخطاب الملك. ترياب لمصداقية خطاب العرش. الملك خطب مع الشباب ماشي مع امثال لشكر اللي من الماضي وخاصهم يجمعو ريوسهم.
لشكر باغي يلعب بورقة بنتو ايلى هدرو على الشباب ودافع صحابو يدافعو عليه.
المشكلة ان لشكر مازال كيمارس السياسة بطريقة قديمة. هاد الشي كان نفعو باش دار ديك الاستراتيجية ديال التحالف مع البي جي دي وقلب عليهم باش خدا وزارة العلاقة مع البرلمان فحكومة عباس الفاسي٬ اليوم ما بقاتش خدامة.
