كود سبور//
الماتش ديال المنتخب المغربي داير حالة طوارئ فوجدة.كلشي مجند ليه باش ينجح وباش يدوز في ظروف مزيانة بزاف.
ما يمكنش دوز شي رومبوان بلا ما تلقا البوليس وجدارمية مكايتساهلو حتا مع حد.
التعزيزات فكل بلاصة خصوصا عند مداخل المدينة، لي كتعرف توافد كثير ديال الجماهير.
واخا هاد الماتش، لي غادي ينطلق فالسبعة ديال العشية، فالملعب الشرفي في وجدة في إطار استعدادات المنتخب المغربي للاستحقاقات القادمة، ما شي رسمي وما عندو حتا اهمية، لكن كلشي باغي يدخل ليه ويشوف المنتخب المغربي. التذاكر مابقاتش وتسالات لكن كاين أصحاب السوق السوداء دايرين الفوضى بعدما استغلوا فشل البوليس في مطاردتهم.
الضو ديال الملعب الشرفي حتا هو داير حالة طوارئ، البارح زارت الملعب لجنة مختصة من ولاية أالامن والسلطة المحلية والمنتخبة باش تجرب الإنارة قبل الماتش وتعرف واش كتستجب للمعايير المحددة من قبل الاتحاد الدولي لكرة القدم، خاص الضو يكون مجهد اي فحدود 1600 وولت. هاد اللجنة وقفات كذلك على حالة مرافق الملعب والمستودعات ومنصة الصحافة.
العديد من وجادة أكدوا بلي الملعب الشرفي مازال ماسالاش، كاينة روتوشات لي خاصها تدار، رغم أنه أصبح في حلة جديدة.
