كود كازا//
كشف عبد الفتاح شكيب، عضو اللجنة العلمية والتقنية، أن أقسام للإنعاش عامرين بالمصابين بكورونا اللي ماملقحينش، ومنهم شباب عندهم بين 35 و45 عام فيهم اللي مصابين بأمراض مزمنة، وناس كبار ماخداوش الفاكسان.
وكشف شكيب أن “سينوفارم” اللي معتمدو المغرب ماكيحميش من الفيروس، لكن فالمقابل ماكيخليش الملقحين يوصلو لمرحلة الإنعاش، وضرب المثل بالشيلي اللي تلقاو فيها 10 مليون هذ اللقاح، وتبين ان حالتهم ماتدهوراتش.
وزاد شكيب، فالنشرة المسائية لدوزيم نهار الثلاثاء، أن حالات الإصابة بمتحور “ديلتا” كتزاد نهار بعد نهار، وخصوصا فالمدن الكبرى، بالإضافة لأن الناس مابقاوش مسوقين، ومابقاوش يديرو الكمامة ومامحترمينش التباعد.
وقال المسؤول نفسو أن التراخي يقدر يأدي لتسجيل 3000 حالة يومية فالسيمانة الجاية، وغيزيدو يكثرو الحالات فسيمانة العيد الكبير.
وطالب شكيب وزارة الصحة والوزارات الأخرى باش تدخل لدعم المختبرات بإمكانات لوجيستيكية إضافية، من اجل تحديد نسبة الحالات المتحورة فالبلاد المصابة ب”ألفا” أو “ديلتا”.