كود الرباط//

علمت “كود” أن مسلسل التسريبات بخصوص المرشحين لمناصب كتاب الدولة، بدات حلقاتو كتخرج، بحيث كشفات مصادر حزبية بلي كاين صراع كبير على منصب كاتب الدولة في الرياضة، لأن الأخيرة واجهة للصراع الاقليمي وكذا واجهة للحروب الدبلوماسية.

هاد الصراع غايكون بين الاحزاب وبين بعض الشخصيات لي غاتبغي دفع ببروفايلات معينة لهاد المنصب.

جوج بروفايلات مشرحين لهاد المنصب نظرا التجربة اللي راكموها فهاد الميدان، وحسب مصادر كود فإن أحد المرشحين البارزين، هو يونس المشرافي، وللي كتجمعو علاقة قرابة عائلية مع نزار بركة.
المشرافي المدير العام للمغربية للألعاب والرياضة، مرشح باش ياخد هاد الحقيبة، كيتلقا بزاف شكيب بنموسى وزير التربية الوطنية والتعليم الأولي والرياضة، بحكم أن الوزير هو مدير المجلس الإداري لـ”المغربية للألعاب والرياضة” MDJS.

وكيشتغل يونس المشرافي مدير عام ديال mdjs المغرب، كان بان فنهائي كأس افريقيا للسيدات، وبانت صورتو.
الصراع ظهر جليا فكواليس مسؤولي الاحزاب، كولشي باغي يشد هاد المنصب.
أما المرشح الأبرز الثاني هو معاذ حجي ، الذي يشغل حاليا منصب منسق عام للجامعة الملكية لكرة القدم، واللي بان كثر فكأس إفريقيا السيدات المنظمة في سنة 2021.
معاذ حجي مرشح كان يشغل منصب مدير ديوان منصف بلخياط عندما كان وزيرا للشبيبة والرياضة. وكذلك اليد اليمنى لفوزي لقجع فالجامعة.

كاين كلام على مرشح ثالث والأبرز هو كفاءة ومدير مؤسسة شبه عمومية ودار حروب ضد الإسلاميين، لي كانو باغين الرأس ديالو ففترة تولي البي جي دي السلطة الحكومية. إضافة الى انه كان عضو مكتب مديري لفريق بيضاوي شهير .
الهضرة هنا على سليم شيخ. واش يقد بها ولا لا؟.
الحسم ديال هاد المرشحين المحتملين، بيد الوزير شكيب بنموسى، وزير مكيخضعاش للحسابات الحزبية والسياسية، ويقدر يجيب بروفايل خارج هاد الاسماء. كولشي ممكن.
مع الدخول السياسي بدات التسريبات تخرج، الاحزاب عينها على هاد المناصب ديال كتاب الدولة.