علي الصافي وهناء ابو علي – كود الداخلة ////
هادي مدة كيطالب المرصد الوطني لمحاربة الرشوة وحماية المال العام بفتح تحقيق فقضية توزيع “النهضة” ديال “العمران الجنوب” التابعة لمجموعة العمران سنة 2013 بخصوص عدم توزيع تلك البقع واخا دار كلشي قانوني.
“كود” حصلات على لائحة المستفيذين من هاد التجزئة كلها اللي فيها 147 بقعة اللي تفتحات للعموم.
المحضر اللي كتنشرو “كود” فيه انو ف7 فبراير مع الخمسة العشية 2013 وفيه ان رشيد حدادي المدير العام ل”العمران الجنوب حينها واحمد الناجي المدير التقني ل »العمران الجنوب » ومحمد الخطيبي مديروكالة الداخلة ديال العمران وبهيج بونالم مكلف بالقسم التجاري ل » العمران الجنوب » ومباركي شريفة مندوبة تجارية ف » العمران الجنوب »٬ وقعو على المحضر.
هاد المحضر فيه ان وضع ملفات اللي بغى يستافد دار ما بين 7 نونبر 2012 الى 01 دجنبر من نفس السنة بعد اعلان يومي فراديو محلي واعلانات تنشرات فالمناطق الاستراتيجية للمدينة.
طبعا كاع اللي استافذو عمرو الطلب ومن الشروط الاساسية الاقامة فالمدينة.
فالحقيقة كان عدد البقع ماشي 147 بل 217 فيها 39 عطاوها لوالي جهة الذهب الداخلة لكويرة. ديك الساعة كان حميد شبار اللي دابا سفير للمغرب في نواكشوط وفيها 15 بقعة لموظفي وزارة السكنى وموظفي الوكالة الحضرية وموظفي « عمرانالجنوب » و 16 بقعة مخصصة خلاوها ايلى كان شيء طارئ. باينة ايلى جا شي حد من البوليساريو فاطار ان الوطن غفور رحيم او بحال هاد لشي.
تقدمات 6153 طلب وخداو 147
وفق مصادر ل”كود” فان كلشي كان جاهز باش يعلنو على الاسماء ويعطيو للناس بقاعيهم. والي الجهة حينها دخل وقال باللي غادي ينوض الصداع. كانت الداخلة عرفات عامين قبل هاد التوزيع اي 2011 احداث دامية وماتو فيها مواطنين. الاحتقان كان كبير بزاف بين سكان الداخل وسكان الداخلة.
الوالي قرر يوقف كلشي. وقفو واخا ما عندوش الحق. وقفو وشركة “العمران الجنوب” خرقات القانون. كلشي كان عندها مقاد. دابا هاد الملف مازال ما تسد. باغيين يديرو تيراج اوسور جديد باش يختارو ناس جداد. التخربيق وصافي
“كود” اختارت تنشر كل اسماء المستفيدين اللي ما عمر الشركة بغات تكشف عليهم.
