محمد سقراط-كود///
الجزائر سنوات وهي كتمول البوليزاريو بالسلاح والفلوس والأرض والسياسة، ماتو بزاف ديال المغاربة بسباب التمويل والدعم ديال الجزائر للبوليزاريو بشكل مباشر، ولكن نهار المغرب قرر يهدر على إستقلال القبايل ناضوا مغاربة الداخل المبدئيين وعتابروا الامر سقطة للديبلوماسية المغربية، نهار قرر المغرب يتعامل تقريبا بالمثل مع الدزاير، لأنه لحد الىن صعيب يتعامل بالمثل وكون جا يتعامل بالمثل راه غادي تكون الدزاير مقسمة، لأنه ربما مكاينش شي دولة في العالم عشرات السنين وهي ناسية بلادها وشعبها ومقابلة دولة جارة تحفر ليها وباغا تخربها وكتخسر الفلوس صحيحة باش تقسم دولة جارة عرفات منها غير الخير وكانت داعم كبير ليها في الإستقلال ديالها.
التبون ملي كيفيق حتى ينعس وهو المروك المروك، بينما في المغرب قليل فين تسمع سيرتو إلا من باب الطنز أو فشي خبر عادي لا غير، نظام كامل مبلي مدمن بالرغبة في تخريب المغرب عوض إصلاح بلادو، ونظام رغم تعاقب الرؤساء والحكام بقا ديما محافظ على نفس العقيدة وهي دعم تقسيم المغرب، نهار عمر هلال هدر على حق القبايل في تقرير مصيرهم حتى هوما وعلاش لا يأسسوا دولة ديالهم بوحدهم، راه أصلا كانو دولة شحال هادي، بزاف ديال الهدرة حول أن المغرب ماخاصوش يسلك هاد الطرق لي مخدمة معانا الدزاير نيت، وأنه خاصو يكون هو مول العقل وهو الحكيم والحليم والمسامح، وماخاصوش يبغي تقسيم البلدان بحال كيف باغين هوما يقسمو بلادنا.
هادي بلاد كتدير السياسة مع عدو مباشر واضح وصريح كيسعى النهار كامل لأنه يضر بلادنا لي ماخاصش تكون هي مولات العقل، وماتديرش وماتفعلش وماتعاملش بنفس الطريقة، لا العكس خاص تحماق مع مهم، خاص المغرب حتى هو يفتح سفارة للقبايل هنا، وفين مامرض شي واحد في الحكومة القبايلية نجيبوه في طيارة يداوا في المغرب بلاش نسيفطوه برا كولشي كاين هنا، وعلاش لا يتم دعم كاع الحركات التحررية في الدزاير وراهم كثار ، عشرات السنين والمغرب هو مول العقل ومع ذلك مابغاوش يتعقلوا حكام الجارة علاش لا يحما قمعاهم المغرب شوية كي كيديرو معاه.
