محمد سقراط-كود///

طنجاوة الجدد عندهم واحد الإحساس تاريخي بالمظلومية إتجاه الدولة، كيحسوا بلي خاص يتعاملو هوما ومدينتهم معاملة خاصة غير حيت جات قبالت أوروبا، وبالنسبة لبزاف ديال طنجاوة أن الترييحة فسور المعكازين ويضرب فيك الغربي دسبانيا أمر كافي باش تولي مدينتهم تابعة لفضاء تشينكن، وحاليا كاين كم كبير من المنشورات التظلمية وشبه حملة ضد قرارات الدولة بشأن التصدي لفيروس كورونا، وبزاف ديال المنشورات كيفسرو الامر على أنه مؤامرة ضد طنجة لأنها مدينة متحضرة بزاف وباغين يردوها بحال لاربعة دالغيس، وأن هادشي ممنهج والقرارات ديال الدولة فيها كره شخصي لطنجاوة وللبحبوحة لي عايشين فيها وللزهر لي حطهم فديك المدينة، وهاد الإحساس هو لي خلاهم يديرو مظاهرة فبني مكادة نهار بغاو يسدوها، والنتيجة هو تحولها لبؤرة.

طنجة من أحسن المدن في المغرب وأجملها بالنسبة ليا، تزاديت وكبرت فيها ومكاين حتى شي تحامل في هدرتي ضدها، غير هو راه من غير المنطقي أن الواحد يعتابر قرارات الدولة في منع بعض الأنشطة راه في الصالح ديالو وماشي ضدو، آش فيها أصلا الى داز عام وعامين ومامشيتيش للبحر ولكن بقيتي عايش وواليديك بقاو عايشي نراه هاداك هو الربح، مايمكنش للواحد يكون أناني بزاف كثر من لقياس وهو عارف أنه غير فالمغرب، بلدان عندها أحسن الأنظمة الصحية في العالم وغلباتهم كورونا ودارت فيهم حالة، والمغرب نيت حتى كاع الى كان النظام الصحي ديالو مخير شحال قدو يتحمل شهر جوج عشرة، ضروري غادي يجي وقت وغادي يعيى، راه الطاقم الطبي بشر حتى هوما ومغامرين بحياتهم وحياة الأسر ديالهم وحتى هوما راه معرضين للإرهاق والإجهاد حد الإستنزاف.

كلينت إيستوود في فيلم هاري لمقود Dirty Harry كيقول أن (الرأي بحال التقبة ديال الزك كولشي عندو)، وحاليا كنشوفوا التقابي ديال بزاف دالناس فالفايسبوك صحاب المنشورات ( ديال طنجة تنتفض وعلاش طنجة، وهادي حكرة كبيرة أن طنجاوة بالخصوص ممنوع عليهم لبحر، وأصلا الفيروس كاين غير فالعروبية لي خدامين فالمناطق الصناعية هوما لي خاص يسدو عليهم اما طنجاوة مكيخدموش لذا مكيتاصبوش بالفيروس)، للأسف هاد المنطق كيفكرو بيه بزاف ديال الناس وللأسف أيضا انهم شباب لي من المفروض يكونوا فاهمين وواعيين وعارفين مخاطر هاد الفيروس، راه تكون ضد حالة الطوارئ الصحية إيديولوجيا راه موقف يمكن التفهم ديالو داك الساعة راه عندك فكر وكتدافع على فكرة، أما تكون غير مكلخ وحاس بتضخم الأنا وعندك أعراض جنون البقر والعظمة وكتهدر على راسكن كأنك مستهدف لذاتك وشخصك فقط لأن الزهر والعبث خلاوك تزاد في طنجة فهادشي راه قمة الخطورة وهاد العقلية راه خلقات حاليا بؤر وغادي تخلقهم كثار مستقبلا.