هناء ابو علي كود كازا ///
واش ممكن نصدقو الابناك؟ الجواب ديما للا ما عمر شي مواطن يصدق بنك. كيرحبو فكلشي كيخرجو من كاع العمليات رابحين. الباطرونا باش زعزعاتهم ورجال الاعمال فرشوهم وفرشو تصرفاتهم الجشعة ببيان قبل 3 ايام جا رد المجموعة المهنية لبنوك المغرب واليوم دارو بيان.
هاد البيان فيه باللي غاديين يفعلو “ابتداء من غد الاثنين 30 مارس، الاجراءات التي اتخذتها الأبناك في إطار لجنة اليقظة الاقتصادية لدعم الأسر والمقاولات التي تأثرت بشكل مباشر بتداعيات كوفيد 19”
اذن حسب الابناك خاصك دير طلب. شوفو لقوالب. ديما فيهم لقوالب وخطيرين. وزادو انو بعد هاد الطلب يكون “سداد أقساط القروض المستحقة والليزينغ من شهر مارس حتى شهر يونيو ، بدون مصاريف أو غرامات التأخير”
الحاجة الثانية فالبيان باللي تم “احداث خط ائتمان إضافي لنفقات التسيير بالنسبة للمقاولات المتضررة ، قابلة للاسترداد في حد أقصاه 31 دجنبر 2020” غير هنا الابناك كيف ديما عزيز عليهم لقوالب قالو “المقاولات المتضررة”. لبلاد كلها واقفة وهما قالو المتضررة.
ثم كيفاش نقصو لمقاولات الاخط الائتماني ب50 بالمائة كيف قالت شهادات رجال اعمال ل”كود” البارح٬ ودابا كيقولو “احداث خط ائتماني اضافي”. ما شرحوش واش كاع المقاولات غادية تستافد ولا غير مقاولات معينة وشحال هاد الخط الائتماني.
هنا فهاد التفاصيل ديما المجموعة اللي كيسيرها فعليا محمد الكتاني ديال “التجاري وفا” وعثمان بنجلون غير واجهة مع السن ما بقى يدير والو٬ كدير لقوالب. خاص بنك المغرب وخاص الدولة تراقب تصرفاتها