كود علي الصافي ///

قبل ايام قال ادريس لشكر الكاتب الاول لحزب الاتحاد الاشتراكي ان الوقت جا باش نديرو نقاش هادئ ورزين حرل مستقبل سبتة ومليلية المحتلتين. هاد الشي جا فرسالة كان رسلها يوم 25 ماي اللي فات لشكر لرئيس الحكومة زعيم الحزب العمالي الاشتراكي بيدرو سانشيث.

طبعا هاد الاخير ما ردش عليه.

فندوة شاركات فيها احزاب الاغلبية والمعارضة قال نور الدين مضيان برلماني حزب الاستقلال باللي جا الوقت نطالبو بسبتة ومليلية والجزر الجعفرية.

الخرجات بجوج غير مزايدات خاوية. شعبوية وصافي. الوجدان المغربي عارف باللي سبتة ومليلية محتلتين. هادي عارفها العادي والبادي. الدولة المغربية ما عمرها طالبات ابدا بهاد المدينتين.

الحسن الثاني كان قال باللي المطالبة بالمدينتين غادي كون بعد ما تسترجع اسبانيا جبل طارق. لكن المغرب عندو اولوية اخرى. الاولوية دابا هي الصحراء. هاد الشي علاش مخلي هاد الموضوع ديال سبتة ومليلية وما قادرش دابا فوضعيتو الاقتصادية وقوتو العسكرية يفتح جبهات وخاصة الجبهة الاسبانية اللي مازال عندها دور فالصحرا وهاد الشي اللي وقع فسبتة مؤخرا كولو عندو علاقة بهاد الملف. الرباط كتجبد الملف ديال المدينتين غير باش ياخد دعم اسبانيا فالصحرا. طبعا الجارة الشمالية حتى هي عارفة هاد الشي وكتلعب بيه.

لكن اوراق كثيرة تخربقات مع هاد الشي اللي وقع مؤخرا.

لكن علاش دعوات لشكر ومضيان تخربيقة من سياسيين؟ لسبب بسيط. كاين واحد الرقم كيوضح كلشي. الدخل ديال سبتاوة اللي عددهم 85 الف نسمة كيفوت 14 مرة دخل اقرب مدينة مغربية اللي هي كاستييخو. الدخل الفردي السنوي لسكان سبتة 23507 اورو وفالمغرب فحدود 1600 اورو للفرد فالعام.

غالبية هاد الدخل جايبة من الكونتر باند. كيدخل للمدينة قبل ما يسدوها كان ما بين 12 الف و15 الف مغربي وهاد لمدينة كتصدر لينا 700 مليون اورو من السلعة سنويا.

الخطة اللي دايراها الدولة لحد الان مزيانة. تخنق سبتة ومليلية اقتصاديا. دير ميناء كبير بحال طنجة الميناء وتقوي اقتصاد المضيق ولفنيدق ومارتيل والناظور وتخليهم مستغنيين على سبتة ومليلية. اما ديك التخربيق ديال مضيان ولشكر راه ما صالح لوالو.

لشكر كاين حزبو فالحكومة ومضيان كان حزبو كيسير الحكومة هادي سنوات. اش دارو من مشاريع باش يرجعو هاد المدينتين. خدمتهم يبدعو حلول.

باش طالب دابا باسترجاع سبتة ومليلية خاص استفتاء لتقرير المصير. هاد الشي اللي معمول بيه دوليا. مضيان ولشكر متأكدين باللي ما كاين اللي غادي يصوت على الانضمام للمغرب فهاد الوقت. لو ان اسبانيا ماشي مع الاتحاد الاوربي ومع هاد الازمات اللي ضرباتها كان غادي يكون وضع اخر. دابا خاص الخدمة والسكات.