كود كازا//

غرفة الجنايات الابتدائية بمحكمة الاستئناف فكازا حكمات على متورط في جرائم هتك عرض قاصر يقل سنها عن 18 سنة بالعنف والاحتجاز بهدف أداء فدية بـ 15 سنة سجنا نافذا. المحكمة زادتو في الدعوى المدنية التابعة بأداء تعويض لفائدة المطالب بالحق المدني القيمة ديالو 80 ألف درهم. هاذ المجرم تشد من طرف البوليس بعد ما بقى مدة طويلة روشيرشي.

المتهم اعترف تلقائيا بالمنسوب إليه بعد مواجتهه بالقاصر الضحية أمام قاضي التحقيق بحضور وليها القانوني. استدرجها للدار وهتك عرضها وخلاها مشدودة عندو وطلب من الأسرة ديالها فدية ب 20 مليون سنتيم.

بزاف ديال الملفات الجنائية المطروحة قدام محكمة الاستئناف اللي الضحايا ديالها قاصرين تعرضو لاعتداءات جنسية متعددة ما بقاتش كتاخذ وقت كبير ودغية كيتحكمو المتهمين اللي فيها وهاذشي جا بسبب الضغط اللي مارساتو الصحافة وجمعيات المجتمع المدني خلال ملفات استأثرت باهتمام الرأي العام في السنوات الأخيرة.