كود هناء ابو علي ///
المتهم فاكثر من قضية بالاغتصاب وهاد القضايا ففرانسا ماشي فالمغرب تزوج. كنهدرو على هاد الشخص اللي كون كان فشي دولة فيها الحد الادنى لاحترام النساء٬ كان مجرد الاتهام ماشي المحاكمة٬ تمنع اغانيه. تمحيه من الدنيا فنيا. لكن هاد الشخص وكنقصدو بيه سعد لمجرد كيشارك فسهرات. كيحضر لعراسيات وكيدور فالعالم غير المحترم لحقوق المرأة =عند لعرب= وكيحيي سهرات وكيخرج البومات مع بعض الفنانات اللي كيدعيو الدفاع عن المرأة بحال اليسا.
سعد لمجرد متهم بالاغتصاب ففرانسا. فالمغرب خرجو قصص لمغربيات كيتاهموه لكن النيابة العامة ما عمرها فتحات تحقيق فهاد الاتهامات.
دابا القضية ماشي محاكمتو اللي مازال قائمة ففرانسا ولكن زواجو. شفنا نساء يقدرو يكونو ضحية من ضحاياه المحتملات فرحانات وكيباركو ليه. كيباركو لواحد عندو تهم ثقيلة كتواجهو ففرانسا وتشد فالحبس لمدة قبل ما يفرجو عليه ويتابعوه فحالة سراح.
كيفاش يمكن لشي مرا تقبل دافع عليه وتعبر على فرحتها بعرسو وهي ديما مصدعة لينا الراس فمحاربتها للماتشيست للفكر الذكوري ما بالك بمتهم بالاغتصاب.
هادو تفرشو وبينو انتهازيتهم. عندهم انتقائية مرضية ففهم حقوق المرأة والحريات الفردية.
هادا لاصقاه افعال مشينة افعال خطيرة. وا بنادم راه ممثل بحال كيفن سبايسي غير خرجو تهم كتهم التحرش ماشي الاغتصاب تشطب عليه من الساحة الفنية. اصبح من خبر كان. كيفاش تقبل قنوات واذاعات خاصة مغربية واجنبية دوز اغاني هاد الشخص. خاصو يتمحى فنيا. ايلى ماشي دائما على الاقل حتى يقول القضاء كلمتو فقضيتو اللي كاينة ففرانسا. قبل هاد الشي خاص اي امرأة. اي راجل كيحتارم لمرا يكون عندو موقف من هاد الشخص.
راه بالطريقة اللي كيتعاملو معاه دابا كاين تطبيع مع الاغتصاب ضد لمرا.
