كود كازا//
عبر رئيس الحكومة عزيز أخنوش، على الفرحة ديالو بحال كافة المغاربة، ودار تدوينة على صفحتو الشخصية على فيسبوك، شكر فيها أسود الأطلس على الإنجاز اللي دارو، بعدما تأهلوا لربع نهائي مونديال قطر 2022، على حساب منتخب إسبانيا اللي هو واحد من المرشحين باش يدي الكاس.
وكتب أخنوش فالتدوينة “شكرا للمنتخب الوطني على هاد الفرحة الكبيرة للي دخلها على قلوبنا، بالتأهل التاريخي ديالو لأول مرة فتاريخ الكرة المغربية والعربية لربع نهائي كأس العالم. وشكرا للجمهور للي كان مبهر فالمدرجات، وقدم صورة حضارية على بلادنا”.
وأضاف “من المؤكد أننا كمغاربة غادي نتذكرو هاد الإنجاز لسنين طويلة، ومغاديش نساو بطولات اللاعبين ديالنا، للي قدمو للجميع دروس فالتضحية وحب الراية المغربية.”
وختم أخنوش التدوينة ديالو “أمنيتي واللي هي أمنية كافة المغاربة، هي يزيدو يكملو الملاحم الكروية ديالهم فالمونديال، بالتأهل لقادم الأدوار إن شاء الله. قلوبنا معكم .. ديما مغرب”.
للتذكير فالمنتخب الوطني المغربي على موعد نهار السبت الجاي، مع الماتش ديال ربع النهائي ضد البرتغال، مع الربعة ديال العشية بتوقيت المغرب.