عادل المكناسي كازا /////

اعلان حكومة بنعرفة البارح باللي مسيرة يوم غد الخميس 20 يوليوز ممنوعة عبثي وما عندو معنى. المنع عندو قواعدو. خاص تكون الجهة المنظمة معروفة باش تعيط ليها السلطات وتسلمها وثيقة وتوقع على القرار وتحمل تبعاتو. الحال ان هاد المسيرة كان دعا ليها الزفزافي قائد حراك الريف باش كان ما مشدودش فالحبس وبقات الفكرة وتبناوها ناس خراين. راجت فالفايسبوك. اذن ما معروفش شكون وراها ولا شكون منظمها. حتى الحكومة من خلال عمالة الحسيمة غير كتخربق. ايلى كانت تقصد برسالة المنع شباب الحسيمة ما غادينش يتسوقو ليها. ايلى كانت تخلعلهم موحالش تعطي هاد العملية اكلها. حقاش منعات شي حاجة ما كايناش فالواقع. هي دعوة افتراضية ومنع افتراضي.

كاينة نقطة اخرى مهمة بزاف. كولو لينا وقعاتش كانت شي مسيرة من عشرين فبراير 2011 وهادي 8 اشهر فالحسيمة خدات شي تصريح. اذن المسيرات فالمغرب لاعتبارات كثيرة بلا رخص. وزير الداخلية عبد الوافي لفتيت قال البارح فالبرلمان باللي “تم تنظيم حوالي 14.400 مظاهرة بالشارع العام بكل حرية خلال سنة 2016 فقط، بمعدل 39 مظاهرة في اليوم، كما تجاوبت السلطات إيجابا مع تنظيم 9581 تظاهرة بالشارع العام خلال النصف الأول من السنة الجارية، بمعدل 50 تظاهرة في اليوم”.

وزايدون كاينة نقطة اخرى. واش مسيرة الشوهة ديال ولد زورال قبل الانتخابات التشريعية ل2016 كانت عندها شي رخصة. واش ولد زروال ولا غيرو من هادوك اللي جابوهم لمقدمية والشيوخ وبرلمانيين وقياد باش جاو لقلب المغرب الاقتصادي الدار البيضاء ودارو هاديك المسيرة طلبو شي ترخيص. وزير الداخلية حينها محمد حصاد تبرى منها واللي كانو وراها لاحوها على الدولة.

دابا صحاب الحراك ديال الريف كان عليهم يعرضو على ولد زروال ديال البام حقاش كاع المنتخبين من نفس الحزب واخا ناس الحراك ضدهم ماشي مشكل٬ يطلبوهم غير هاد المرة يكون ولد زروال فالمقدمة وهاديك الساعة لا الداخلية لا غيرها غادية تقدر منعهم. تجربة ولد زروال خاصها تعمم فالمغرب اللي عندو مشكلة فشي مسيرة يعيط عليه. يقدر يجيب معاه حتى هادوك اللي بغاو يخرجو بنكيران من الصحرا واللي هزو شعار “لا لاسلمة المجتمع” وشي شعارات ما عارفينهاش اش كتعني كاع