اسماء غربي كود /////

فضيحة الكوبل الشعبية دنيا بوطازوت وكبور حسن الفد حامضة. بجوج بينو على مستواهم الحقيقي. النيفو طايح بزاف. الفد وفق ما نقله الاخبار قال في حفل بمسرح بوجميع بخصوص قضية بوطازوت والصف والمحكمة والضرب وو “انا ديما كندير الصف من نهار عقلت وانا داير الصف”. صعيب نصدقو هاد لكلام لان اولاد الشعب اللي كانو كيقراو فثانوية عقبة بن نافع بالحي المحمدي الرسم عند الاستاذ حسن الفذ عندهم ذكريات خايبة معاه. ما علينا الفد اضاف “كون جينا اي واحد ما دارش الصف فالمغرب وهرسنا ليه نيفو كون كلشي تربي وداير الصف”. مستوى ديال الغاب. عارف باللي ايلى كال كلام بحال هادا فكندا اللي عايش فيها يقدرو يرجعوه لبلادو. حقاش تصرف غريزي حيواني هادا. لبلاد كاين فيها قانون. خاص تطبيق القانون ماشي كل واحد ياخد حقو. الفد فهاد التصريح مع هادوك اللي اعتداو على مثليين باش دخلو عليهم لدراهم ببني ملال مع هادوك اللي اعتداو على مثلي فاس مع هادوك ديال الامن بالمعروف او البوليس الديني. يعني الشعب يدير القانون بيدو. كون كان عايش هنا هاد لكلام المتخلف ما يقدرش يكولو ولكن عارف فكندا ما غاديش يوصل وفالمغرب جا غير يصور كابسول لقناة ودبر على الصرف وبغى يبان فنان ملتزم دار حفل فمسرح بوجميع ورجع.

بوطازوت ردات عليه بطريقة متخلفة وخاص الفرقة الوطنية ومكتب الصرف يتحركو ويفتحو تحقيق فتصريحها ل”اطاحة“. السيدة تتهم الفد بتهريب اموال الى كندا وماشي غير هاد الشي كتكول باللي اموال الشعب ديال مؤسسات عمومية واضافت ل”احاطة” “ما كنجيش من رمضان لمرمضان نعمر لمزيودة ونرجع” “ما خيدتش اموال المؤسسات العمومية وهربتها لكندا”. دابا هي عندها الدليل ان الفد هرب وخاص البوليس يستمع ليها والنيابة العامة تفتح تحقيق فالموضوع راه موضوع خطير بزاف

اما كونها قالت انها بنت التشارك /الحي للي كاين فكازا/ وغادية نبقى عايشة فيه” غير شعبوية وصافي. هاديك مشكلتك وهاداك قرارك عيشي فيه عيشي فالكاريان عيشي فالفيلا ما سوقناش. كولي لينا كيفاش الفد هرب لفلوس هادي مهمة