كود : سهام البارودي ==
لاش المحجبات عندهم مشكل مع الصاية في حين الصاية ماعندهاش مشكل مع الحجاب؟
بالنسبة للوقفة لي دارو الحجابيات نهار الاحد حدا البرلمان فاطار قليان السم للصحابات “الفيديخاليات النسائية” كيما كايسميوهم ! زعما نتوما خرجتو على ود الصايات حنا انخرجو على ود الحجاب ! المشكلة ماشي فالحجاب طبعا لي بغات تلبس تا ميكة ساك تلبسها المشكلة فدوك الناس لي ديما تايشوفو راسهم واعرين على الاخرين حيت صحاب قال الله قال الرسول ديما كايتخايلو راسهم لاعبين الدور د سبارطاكيس محرر العبيد ! قالك علاش “الفيديخاليات النسائية “ماكادافعش علينا ! وا هو الصراحة هوما كايدافعو على كاع النساء و لكن نتوما ياك اصلا مامآمنينش بالمبادئ ديالهم و هي انو كل مرا تلبس لي بغات و ماكاتحملوهمش و كايجيوكم عيالات شارفات خايبات مطلقات حاقدات الخ الخ الخ! ولا كيفاش زعما ؟ عيني فيه و التفو عليه ! السردين زوين و مصارنو خايبين ؟! على الاقل ماعمرهم هوما دارو وقفة ضد الحجاب و لكن نتوما لبارح درتو وقفة ضد الصاية بغيتو فيها “تجريم العري” ! معروف انو العري مجرم فالعالم كامل … يعني غاراضكم نتوما ماشي هو العري ديال بنادم يخرج زبط ! و لكن نتوما ضد البنات لي كايلبسو الصايات و الكسيوات يعني بالعربية تاعرابت بغيتو بنادم يلبس على هواكم و هادشي علاش خرجتو لبارح !
سمحو ليا بالزربة ! المغرب ديال كلشي ديال الصايات و الجلابات ! ديال الكساوي و الدرور ! ديال المايويات و البناطيل … ماشي ديال الحجاب بوحدو و لا ديال الصاية بوحدها! راه تاواحد ماحسن من حد … و ماشي حيت دايرة الحجاب راك عفيفة اكثر من وحدة مادايراهش! و خاصك امتيازات و نفرحو بيك و نهزوك فالعمارية، راك فحالك فحال اي مواطنة مغربية ! و كلنا كمغربيات كانخلصو الضرائب و كانأديو الادوار ديالنا كمواطنات فدولة !
المشكلة ديال هاد الناس ! انهم كايتخايلو المغربيات قاصرات خاصهم وصاية، يعني كاع لي مادايراش الحجاب راها خاصها ديرو يا ايما بالنصيحة يا ايما بالقوة (فرض قانون يجرم التعري) و التعري عند صحاب قال الله قال الرسول راه معروف! دابا هاد الناس بكامل قصوحية الوجه ف 2015 عوالين يجيو يوريونا شنو نلبسو ! ايوا ا سيادنا الصايات راه كايلبسوهم المغربيات من الخمسينات و زيد لقدام و فاش كانقولو المغربيات راه من جميع الفئات الاجتماعية من الاميرات حتى للبنات الشعب ! و سطر ليا مزيان على هاد الجملة ! راه المغرب هادا ماشي السعودية و لا افغانستان !
و زايدون شكون منع الحجاب و لا قرب جيهتو اصلا ؟ ياك لي بغات تلبس الحجاب و لا الخمار و لا النقاب و لا دير تا التشادور ديال افغانستان تاديرو ! واش الدولة منعاتكم ديرو الحجاب ؟ “الفدخاليات النسائية” عمرهم خرجو قالك ممنوع الحجاب ؟ و حتى بالنسبة للتحرش لي يمكن تتعرض ليه محجبة فالمغرب فطبعا راه تاتعرض ليه حتى هاديك لي “سافرة”! يعني موس واحد كايذبحنا كاملين …و كون كان فيكم الربح كون درتو اليد فاليد وهضرتو نهار الناس هضرو على التحرش ماشي تكمشتو و عجبكم الحال و تللذذتو حيت هادوك البنات مالابسينش الحجاب ماشي مشكل لي جا يمسح فيهم يديهم و دابا ملي بديتو كاتسمعو “داعش” “و الله يجيب لينا شي داعشية تفيقنا للفجر” فالزنقة عاد طفات عليكم الشمعة و تقرصتو! و اصلا حتى فاش كايكون منع ديال الحجاب فراه كايكون من طرف الاسرة ماشي من طرف الدولة ! يعني الام ماكاتبغيش بنتها ديرو، الخالات كايقولولها مازالة صغيرة، ماشي دابا، ديها فقرايتك … الدولة ماعندها دخل فهاد المنع و مايحتاجش توقفو عليه حدا البرلمان يمكن تمشيو لقصة الناس و لا الخيط البيض حيت هوما لي كايحللو مشاكل الاسر ماشي الدولة !الحمد لله المغرب ديال كلشي ! و المشروع الحداثي لي غادية فيه البلاد غادي و كايتقدم خطوة خطوة رغم بعض الاصوات القليلة جدا(قلة عدد المشاركات فالوقفة) لي ماحاملاش…
للاسف كاينين شي مبادرات كايبينو انو عدو المرأة هو المرأة بحد ذاتها ، داك النهار عيالات قادات براسهم تبارك الله عليهم مراوات و نص و رجال اذكياء ماشابعينش خودنجال خرجو كايدافعو على حق المرأة و حريتها فاللباس و جاب الله التيسير و الدولة سمعات صوت الحق ! و بنادم ماعرفت مالو ضارو راسو و خارج تاهو فالشموش نهار الاحد فاطار اجي نديرو العصا فالرويضة … اودي تا را الحمد الله لي المخزن بعقلو و عارف شكايدير كورا البلاد ولات لوبية فيدين شي وحدين !
