26/04/2024 11:55
نسبة انتشار التدخين بين التلاميذ اللي عمرهم بين 13 و15 عام وصلات لـ6 % وبنموسى: الظاهرة من الأسباب المباشرة ديال ضعف التحصيل الدراسي
كود سهام البارودي ////////
شي مرات كايطراو احداث فالمغرب و فاش كاتشوف التعاليق ديال الناس و ردود الفعل ديالهم كاتقول الحمد لله على نعمة المخزن و كفى بها نعمة !
علاش الحمد لله على نعمة المخزن ؟ حيت بكل بساطة بزاف ديال الناس معانا مازال عايشين فعقلية العشيرة و القبيلة. و كن ماكانش المخزن كون كلينا بعضياتنا كي الكلاب الجيعانة، ديك النعرة القبلية عندنا و متجذرة و للأسف واخا العالم كامل غادي فطريق العولمة و القرية الصغيرة و المبادئ الانسانية حنا راجعين مارش آريير و مازال عندنا بنادم كايفتاخر بانتماؤو العرقي على اساس راه دار شي حااااجة يستحق عليها وسام ” أنا ريفي” ” أنا مزابي” ” أنا فاسي” … و الغريب هو الربط لي كايديرو هاد الناس بين الانتماء العرقي و شي مفاهيم فحال “الشرف” و “العفة” و “تارجليت” ، كاتلقا واحد بعقلو عايش فهاد الوقت ماشي زعما خارج من شي فيلم تاريخي ديال نجدت اسماعيل انزور كايقولك ” الريفيات مستورات” ” الأمازيغين اشرف من العروبية ” و … و …. و…! تخايل معايا فزمن العولمة و le métissage حنا عاد بغينا نقسمو البلاد بين ايمازيغن و ريافا و صحراوا و العروبية … حنا عااااااد اليوم كل واحد فاق و حس بجنابو و بغا يردنا لعهد الديناصورات ، واقيلة نبدلو حتى الحالة المدنية و نزيدو فيها فلان بن فلان من القبيلة الفلانية … شوف التخلف يا أخي كيف داير!
جوج احداث وقعو كايبينو بيلا بصح حنا راجعين باللور، الحدث الأول هو وفاة طالب امازيغي على يد طالب “صحراوي” و الحدث الثاني هو إمام سلا لي قال بيلا الزلزال فالريف سبابو تجارة الحشيش لي مزوهرة تما ! بغض النظر عن الأحداث بحد ذاتها، و لكن ردود الفعل كانت “مقرفة” ! فقضية الطالب الأمازيغي دخلت للصفحات ديال ايمازيغن لقيتهم منوضين روينة و طبعا كاع التهيميج و الكبت و الارهاب و الدموية لصقوهم فالعرب و فصحراوا على اساس ايمازيغن هوما قدوة فالمثالية والسلام، و فاش دخلت للصفحات ديال صحراوا نشوف وجهة نظر ديالهم واهليي ! تاهوما محيحين و مسمين على الامازيغين ” ساكني الكهوف” و “ماشي رجال و هوما لي تعداو عليهم و صحراوا غير دافعو على راسهم” ، طبعا كل طرف كايسب الطرف لاخر و كل طرف رد راسو هو مثال و قدوة فالتعامل .
الحدث ديال الامام د سلا تاهوا خلق مشكلة ! ريافة ماعجبهمش الحال يتقال عليهم ارض الفسوق و بدا شي كايتزايد على شي فالانترنيت ،و باش كايتزايدو ؟ يسحابك كايتزايدو على بعضياتهم فدرجة التقدم و لا فالأبحاث النووية، لا لا طبعا! كايتزايدو على بعضياتهم فدرجة الداعشية و الظلامية و الكالاخ لي كلهم عايشين فيه. الفايسبوك شعلات فيه العافية، ريافة كايعايرو ناس العاصمة بيلا هوما لي عندهم الفسق و الفجور فموازين و المهراجانات، و الرباطيين و السلاويين كايردو على ريافة بيلا هوما لي كايفسدو فالمدن الأخرى … شي كايسب شي ! “حنا بناتنا مستورات” ! “بنات الرباط عريانات “… شكون اكثر داعشية من لاخور واش الريف و لا ناس “الداخل” ؟ شكون مازال عايش فالقرون الوسطى واش الريف و لا الناس ديال الداخل ؟ كاتحس بكل طرف ماكرهش يقول للطرف لاخور ” حنا اكثر تخلفا منكم” حيت طبعا الحداثة و مظاهر الحداثة من مهراجانات و حريات تا طرف من اطراف النزاع مارضا بيها تكون عندو. شي كايلصقها فشي كي الخرية ! واش المهراجانات عيب ؟ واش حرية اللباس كايتعايرو بيها الناس ؟ توما شهاد الجهل و الكالاخ لي عايشين فيه و فرحانين بيه !
فاش كاتشوف هادشي بينك و بين راسك كاتقول الله يعز المخزن ! الله يعز المخزن لي جامعنا حيت بلا بيه فحال والو ناكلو بعضياتنا ! و بلا ماينقز شي واحد يقولك ” آ ودي راه المخزن هو لي دار هادشي” المخزن مادار والو. المخزن ماكايحلش راس بنادم و يدك ليه شوكة ” القبلية” ! راه التلفزة و الانترنيت و الفايسبوك بنادم كايشوف على عينيه بيلا العالم كايتبدل و الناس اليوم غادية فطريق كي الابيض كي الكحل كي الريفي كي السطاتي كي الوجدي غير لي بغا يعمر راسو بالفرشي و يسد عينيه و ودنيه… بلا ماتولدو لينا اعداء جداد الله يرحم الواليدين راه العدو ديال المغربي اليوم ماشي هو الأمازيغي و لا الريفي و لا الصحراوي … العدو اليوم هو طرف د الخبز !
