ودبا كذبنا يا احميميد..الوزير مزور أكد ل”گود” هجوم البرلماني المقرب من ولد الرشيد عليه وبلي هادشي شخصي ومعندوش علاقة بالحزب ولا بتيار الحاج حمدي
سهام البارودي كود ////
رسالة إلى منقبة: حلي عينيك و قراي مزيان
أولا نتي لي خاصك تسمعي هاد الهضرة :
ماغاديش نهضر مع راجلك و لا باك و لا خوك و لا صاحبك لي كاتشاطي معاه فالفايسبوك (في مايرضي الله)، غانهضر معاك نتي حيت نتي لي معنية بهاد القضية ديال النقاب و حيت عندك مخك باش تفكري و لسانك باش تهضري !
البارح الداخلية قالك منعات خياطة و تجارة النقاب و بنتي ليا نتي و خواتاتك و صحاباتك و راجلك و خوك و باك محيحين فالفايسبوك و فهمتك ! فهمتك الصدمة ديالك ! وايلي ! كيفاش المغرب البلد الإسلامي لي فيه أغلبية مسلمة و إمارة المؤمنين و كدا يولي يمنع النقاب(البرقع) ؟عارفاك كاتحلمي بداك النهار لي غاتخرجي فيه للزنقة و تلقاي گاع العيالات منقبات و الرجال زوينين كايشبهو للتواركة و الايرانيين بلحيات نقية و مشذبة، ولكن هيهات هيهات ماشي هادشي لي مطراسي فالمستقبل.
ثانيا الحرب على الاسلام حرب وهمية :
لي خاصك تفهمي آ أختاه و لا “أخيتي” كيما كايعجبكم تعيطو على بعضياتكم فالگروبات ديال المنقبات ! هوا راه ماكاينة لا حرب على الاسلام لا والو و ديك الهضرة لي كاضلو تعاودو فيها فالفايسبوك ! “إنهم يحاربون الإسلام” “إنها حرب على المؤمنين” غا تخربيقة كبيرة كاتعاودوها بلا ماتفكرو فيها، علاش غايحاربوكم ؟ على زينكم ؟ على الإنجازات العلمية و الاقتصادية و السياسية ديالكم !؟ على داك مولاي التقدم التيكنولوجي لي مساهمين فيه ؟ علاش غايحاربكم شي حد ؟ شكون نتوما أصلا باش يضربو ليكم الحساب من غير مجموعة شعوب فاشلة مستهلكة و مستهلكة بفتح و كسر اللام ؟ ياك مضاربين غي بيناتكم شيعة و سنة ؟ مصريين و فلسطينيين ؟ سوريين و لبنانيين؟ باش كاتساهمو فهاد العالم باش يحاربوكم الناس؟
ثالتا : الزين غا مشتت فالزناقي و التلفزات و البيران و الجبال
خاصك تعرفي بلي تاواحد مابغا يعريك ! و ديك الهضرة ديال” بغاو يعريونا حيت عيالاتهم عريانات ” “يريدون تعرية نسائنا” تا هي تخربيقة! لي سمع هادشي يقول غا نيكي ميناج و جوليا روبرتس و كارمن ايليكترا و إيمان التسونامي مخشيين وسط النقاب راكم فحالكم فحال گاع المغربيات “السافرات” لي فالزنقة ! فيكم الزوينة و الخيبوعة و لي شعرها حرش و لي شعرها رطب و لي وجها نقي و لي وجها مفرگع حبوب و لي سنانها مقادين و لي سنانها مفرگعة فيهم بوطة يعني ماتحاولوش تغوفلو علينا فحالا المنقبات لا بينو وجهم راه الرجال غايبداو يسخفو فالزناقي و ريوگهم سايلين و يساطحو فالطونوبيلات فالفوروجات بالزين لي كايقطر من المنقبة لا عرات وجها!
رابعا: شكون أصلا بغا يعريكم؟
راه قالو ليكم منع خياطة و تجارة النقاب و صافي ! الداخلية ماطلقاتش عليكم المقدمين ينترو ليكم السوتيامات فالزنقة ! و هاهوما منعو النقاب گاع راه عندك الحجاب الشرعي لي كايبين الوجه لبسيه و لبسي معاه لي بغيتي لا بغيتي “تستري”.
خامسا : البرقع و الحرية الفردية ماكايتلاقاوش حيت القضية فيها السلامة الجسدية للأشخاص لي ضايرين بيك
حاجة مهمة خاصك تفهميها آ أخيتي المنقبة ! أنه مايمكنش ليك دافعي على النقاب و تستعملي مصطلح الحرية الفردية ! من إيمتا أصلا الإسلاميين و الوهابيين كايآمنو بالحريات الفردية؟ واش الحرية الفردية من الأبجديات ديالكم ؟ كاتآمنو بحرية الافطار العلني فرمضان؟ المثلية الجنسية؟ العلاقات الجنسية خارج إطار الزواج؟ لا ايوا شمن حرية كاتهضرو عليها؟! حرية مفصلة على مقاسكم؟ اوكي بغيتو تغمقو علينا و تآمنو بيهم مؤقتا نصبرو معاكم و لكن دوماج ! مايمكنش نعتابرو البرقع حرية فردية حيت فاش كاتغطي وجهك القضية فيها تهديد لسلامة الناس فالزنقة لي ضايرين بيك ! باش غايعرفوك شفار و لا مغتصب و لا ارهابي متخفي وسط الدرابل؟ يعني الداخلية من حقها فهاد اللحظة تمنع هاد الموصيبة ديال البرقع خصوصا فهاد الظرفية الحساسة لي العالم كامل على أعصابو ! ها داعش !ها القاعدة في بلاد المغرب الاسلامي ها جبهة النصرة ها الشباب فالصومال! تعاونو تانتوما مع الداخلية لي كاتحمي السلامة ديالي و ديالكم !
سادسا : البرقع و النقاب و حتى الحجاب مايمكنش تدافعو عليهم بمفاهيم الحريات و الحقوق ! حيت فداكشي ديال حقوق الانسان كاين مبدأ أساسي سميتو المساواة بين الجنسين لي نتوما ماكاتآمنوش بيها، فاش كاتطلبو من المرا تتغطى حيت هي عورة و الراجل هانية يلبس لي بغا في واحد الخرق سافر لمبدأ المساواة بين الجنسين هنا الهضرة على المساواة و الحقوق و الحريات معاكم كاتحبس!
سابعا: ماغاديش نقولك ماتلبسيش النقاب حيت ماشي من ثقافتنا !
حيت غاتجاوبيني داك الجواب الحامض لي كلكم حافظينو ” و علاش الدجين من ثقافتنا ؟ و الميني جيب و السروال و و و ؟
و حيت أنا كانآمن بلي الثقافات كاتبدل و تغير و هادشي لي كانسميوه التلاقح الثقافي
و لكن سمعي ياه ! الدجين ماشي من ثقافتنا وي نقدر نتافق معاك و لكن الدجين ماشي لباس كايمثل ثقافة إقصائية ظلامية، الدجين لباس عادي شرويطة و صافي ! البرقع ماشي غي لباس عادي، البرقع ايديولوجية و إديولوجية خطيييييييييرة! ها علاش ماخاصش دينمو يبقا !
فوالا
نتمنا تكونو فهمتو شي شوية ….
و السلام عليكم و رحمة الله !
أختكم “أم بوكي” إن شاء الله