الرئيسية > تبركيك > هذشي كيخلع وخاص السلطات تتدخل.. حملات ديال العنف باستخدام السلاح والقتل ضد المثليين فأكادير دايرة حالة ف”فيسبوك”
03/07/2020 08:00 تبركيك

هذشي كيخلع وخاص السلطات تتدخل.. حملات ديال العنف باستخدام السلاح والقتل ضد المثليين فأكادير دايرة حالة ف”فيسبوك”

هذشي كيخلع وخاص السلطات تتدخل.. حملات ديال العنف باستخدام السلاح والقتل ضد المثليين فأكادير دايرة حالة ف”فيسبوك”

عفراء علوي محمدي- كود//

حملات ديال الدعوة للقتل والتعنيف ديال المثليين فأكادير دايرة حالة ف”فيسبوك”، دواعش كثار خرجو من الجحور ديالهم باش ينشرو أفكار دموية وإرهابية على الفيسبوك، كيطالبو من خلالها بمحاصرة المثليين فواحد المكان اللي كيرتادوه فالليل فهذ المدينة، وكيفكرو فأنهم يتحاماو عليهم تماك ويشبعوهم عصا، وواحد فيهم كَاع قال فكومونتير أنه باغي”يقتلهم ويشرب من دمهم”، وهذشي بالعلالي، وعلى عينك آبنعدي.

حملات الكراهية والعنف ضد المثليين كثرات كثر من القياس هذ الأيام ولدرجة خطيرة، وهذشي اللي كيستدعي تدخل السلطات لتوقيف هذ المتطرفين اللي مابقاوش كيهددو المثليين بالكلام فقط، لكنهم صبحو يخططو لإيداهم وتعنيفهم وحتى قتلهم إلى سنحات ليهم الفرصة.

وكيخططو الدواعش يطيحو بالمثليين بالقوالب كذلك، واحد فيهم اقترح أنهم يدخلو يهضرو معاهم فالبريفي، حتى يحسو بيهم ثاقو فيهم ويفيكسيو معاهم موعد و”يعطيوهم قتلة ديال الكلاب”، حسب تعبيرو.

داعشي آخر كيقلب على ناس اللي يعاونوه على المثليين، وطلب فسطاتي ليه باش “ربعة يشميو معاه لداك البلاصة مع 12 دالليل، وكيقول ليهم بللي ضروري يكونو مسلحين”.

فالمقابل، شريحة من الكويرز والحقوقيين تداولو على نطاق واسع منشورات هذ الدواعش، باش يحذرو المثليين من ولوج الأماكن اللي مولفين يمشيو ليها فأكادير باش يسهرو، وطلبو منهم باش يردو بالهم فهذ الظرفية.

من جهتها، حذرات جمعية أقليات، فالصفحة الرسمية ديالها، مجتمع “الميم عين” فأكادير، وطلبات منهم باش يحضيو راسهم بسبب حملات العنف، وطالبات السلطات المحلية باتخاذ الاجراءات وحماية المواطنين.

موضوعات أخرى

25/04/2024 09:00

منعش عقاري ل”گود”: مشروع سيدنا لدعم السكن فشل فكازا بسباب المنصوري. وزارة السكنى :لا ها الارقام والمنافسة حرة

25/04/2024 08:00

الطلب على العقارات تبدل فالمغرب. المشترين ولاو كيفضلو السكن لي كاين فالسونطر ديال المدن وإقبال متزايد على الاستوديوهات لي واصل ثمنها لمليون درهم للفوق

25/04/2024 05:00

مصر عايشين فالقرون الوسطى كثر منا.. النيابة العامة ديالهم شدات بلوكَوز مشهورة بسباب فيديوهات “خادشة للحياء”

25/04/2024 04:00

مرات نتنياهو دارت الفوتوشوب باش تبان صغيرة.. تصويرة على موقع “إكس” حولاتها مسخرة على مواقع التواصل

25/04/2024 03:00

ميريكان حكمات على مصممة أزياء مشهورة بعام ونص ديال الحبس.. كتصدر جلود ديال التماسيح واللفاعي