كود كازا//

قالت منظمة الصحة العالمية أن الخدمة لساعات طويلة كيتسبب فيفاة مئات الآلاف من الأشخاص كل عام، وهذشي يقدر يزيد مع وباء كوفيد-19.

وزادت المنظمة، اليوم الاثنين، فأول دراسة عالمية ليها على الوفيات المرتبطة بالعمل لساعات طويلة، أن 745 ألف واحد ماتو بسبب الإصابة بسكتة دماغية أو أمراض القلب المرتبطة بالخدمة لساعات طويلة ف2016.

وقالت ماريا نيرا مديرة إدارة البيئة وتغير المناخ والصحة فالمنظمة أن “الخدمة لمدة 55 ساعة أو أكثر أسبوعيا كتمثل خطر كبير على الصحة”، وزادت “حنا بغينا مزيد من الحماية لهذ العمال”.

وكتقول الدراسة المشتركة، اللي دارتها منظمة الصحة العالمية مع منظمة العمل الدولية، أن معظم الضحايا (72 فالمئة) رجال، فمنتصف العمر أو كثر.

واعتمدات الدراسة فطرحها على بيانات 194 دولة، وقالت أن الخدمة لمدة 55 ساعة أو أكثر فالسيمانة مرتبطة بزيادة خطر الإصابة بالسكتة الدماغية بنسبة 35 فالمية، وزيادة خطر الموت بسبب أمراض القلب بنسبة 17 فالمية بالمقارنة باللي كيخدمو ما 35 حتى ل40 ساعة فالسيمانة.

واشارت الدراسة لأن الناس الأكثر تاثر هوما اللي كيعيشون فجنوب شرق آسيا وإقليم غرب المحيط الهادي، اللي كيضم الشينوا والجابون وأستراليا.