محمد سقراط-كود///
أشهر ممثلة في دور الأم المغربية في الوقت ديالنا هي سعاد صابر وكانت كتمثل الأم الصبارة المكافحة البكاية الطيابة لي دورها في حياة ولادها هو تصبن ليهم تعلفهم وتبكي عليهم، في المقابل ديالها كانت زهور السليماني الملقبة بفليفلة وكانت كتمثل الأم الصعيبة الواعرة مولات الفم الحار وتحامي حومة، من غير هادشي مكان والو حتى جات خديجة أسد وبينات للمغاربة أنه كاين أمهات قاريات مثقفات زوينات أنيقات خدامات أو عندهم مشاريع خاصة ماشي بالضرورة شركات كبار مخبزة أو محل ديال كاسيط فيديو راه مشروع خاص محترم تسييره يتطلب مهارة ووعي، وكيلبسوا مزيان ومصاحبات مع ولادهم مكيضربوهمش ويشيرو عليهم بالصنادل ومزوقينهم بالعصى الدري أو البنت فاش كيكبرو كتلقاهم عامرين بليطراس بحال الى كانوا فشي حرب أهلية وهوما عاشوا غير مع أم مغربية تقليدية.
وشخصية الأب كانو كيجيبوه ديما شبعان تمارة وتكرفيص وغالبو الزمن ويتم إستغلاله من طرف الباطرون ومبلي وكيتعصب وكيهدر مع ولادو غير بالغوات، أب تقليدي سعيد فرحان وحنين مكاينش في التلفازة المغربية والى بغا يضحك ضروري من الكليشي ديال العروبي وتعاوج الفم وتمطيط الهدرة، وفاش كيتزعط الباطرون في بنتو كيرفض ولكن دغية كتغوت عليه لمرة ويتقنع ومن بعد كيتحسن المستوى المعيشي ديالو من خلال بنتو لي تزوجات بالباطرون كأن لا طريق للإرتقاء الطبقي من غير حتى بان سي عزيز سعد الله ودار دور الأب المغربي المرتاح في حياتو لي عندو جانب فني وكيربي ولادو بلا غوت بلا صداع بلا تسلط زائد ويهدر ويناقش معاهم وبلا مايحتاج التاعروبيت باش يضحك.
عزيز سعد الله وخديجة أسد كانوا قصة حب جميلة ومؤثرة وكانوا صورة لفنانة ومثقفي المدينة المتمدنة على عكس العديد من الفنانة لخريين لي كانوا لاعبين على على أريفة المدينة وعلى التاعروبيت والشعبوية والكليشيات الخاوية، هاد الفئة لي مابقاش لي يمثلها في التلفازة المغربية، الصراحة يقدرو يكونوا مؤخرا ولكن راه لحد الآن أعظم كوميدي مغربي لي هو حسن الفذ فاش جرب كوبل موديرن مامشاش داكشي كيف خاص ومتلقاش قبول كبير عند الجمهور بينما الكوبل ديال كبور والشعيبية راه بزاف من الحوارات ديالو عشتهم بشكل شخصي مع الواليد والواليدة وعاشوهم بزاف ديال المغاربة ولحد الآن كيقتلوا بالضحك، وهادي هي صعوبة العمل لي دارو خديجة أسد وسعد الله هو أنهم نجحوا يديرو كوميديا تبعوها المغاربة كاملين ديال أسرة مدينية لاباس عليهم بقيم تامغاربيت الحضارية.
