أنس العمري – كود//

فهاد الظرفية الاقتصادية الصعبة لي جات نتيجة تداعيات “كورونا” والحرب فأوكرانيا، جزء كبير من مشاكل وهموم المغاربة، كما هو شأن باقي شعوب العالم، كيتعلق بالفلوس والمعيشة، والسعي إلى المحافظة على عدم تدهور وضعيتهم المادية لي كلات الدق بسبب التضخم.

غير أن هناك فئة عندها هموم أخرى. بعيدة على هموم الدرويش، هاد الفئة، لي وقيلة كيشوفو راسهم على أنهم “نبلاء” هاد الزمان، مضاربين على واجهات أخرى، مادام أن لي كيتقاتل عليه المواطن البسيط موفر ليهم وبالزايد.

ومن إحدى هاد الواجهات التي تعكس العالم لي عايشين فيه هادو والمختلف تماما على عالم ولاد الشعب، والمجسدة بوضوح اتساع الهوة الطبقية، الصداع لي واقع فنادي ديال المرفحين فلاكوط  ديال عين الدياب فكازا.

فهاد النادي، لي فالأصل خاصو يكون لكاع الكازاويين وتحول من سنين حكر على عائلات قليلة ملايرية وباش تدخل ليه خاصك تكون شكون وشكون، مقربلة فيه على قبل عضو. هاد الشي فبلاصة فالملك البحري ماشي وارثينها على جدودهم

العضو المذكور (ح. ن) تجمعات على قبلو لجنة الأخلاق والتأديب، بحر الشهر الجاري، باش تاخد قرار فحقو، تطبيقا لأحكام النظام الأساسي والداخلي لجمعية النادي.

وذلك بعدما تلقى رئيس الجمعية شكوى كتفيد أن (ح.ن)، تصرف بطريقة غير مقبولة، بصفته عضو فالجمعية.

ومن ضمن الأفعال لي تنسبات ليه، فموضوع الشكوى، تهديدو لرئيس الجمعية والتشهير في حقه عبر مواقع التواصل الاجتماعي.

وقد تقرر فحقو الاستبعاد من عضوية الجمعية، وذلك بعد تأجيلات لأكثر من مرة لجلسة الاستماع إليه، قبل ما يحضر لآخر هاد المواعيد مع أعضاء فالجمعية وأشخاص خرين معندهمش العضوية، حسب ما جا فالمحضر لي دارتو اللجنة، والمتضمن لختم مفوض قضائي.

وتشار فيه أيضا، إلى أن (ح.ن) مبقاش ولا ممنوع من ولوج مقرات الجمعية أو المشاركة فأي أنشطة كديرها.

إيوا، شنو نوعية المشاكل لي كاينة عند هاد الفئة، عايشين فوقت خرى ماشي هاد الوقت لي خدام الدرويش كياكل فيها العصا. مكيقلب فيها لا على عضوية لا فنادي ولا مضارب يدخل لشي بلاصة. مضارب فقط على آش يدخل لولادو من قوت يومي، للي وللا صعيب عليه يوفرو كيفما كان من قبل، بعدما ولات الزيادات المتتالية معيشاه فهم واحد هو يضرب باش يبقى عايش بكرامة مع عائلتو تحت سماء المدينة المليونية، لي كتغلى الحياة فيها نهار على نهار.