الرئيسية > آراء > حصريا على “كود”:  سلسلة “كيفاش السلاطين ديال المغرب كايشوفو “ريوسهوم” وكايشوفو السلطة ديالهوم وكايحميوها؟ !”
18/03/2017 10:08 آراء

حصريا على “كود”:  سلسلة “كيفاش السلاطين ديال المغرب كايشوفو “ريوسهوم” وكايشوفو السلطة ديالهوم وكايحميوها؟ !”

حصريا على “كود”:  سلسلة “كيفاش السلاطين ديال المغرب كايشوفو “ريوسهوم” وكايشوفو السلطة ديالهوم وكايحميوها؟ !”

كود -عبد اللطيف اگنوش -أستاذ باحث جامعة الحسن الاول- سطات ////


في الحلقة السابقة، تناولت قضية “المصطلح” ديال الدولة، وقلت بللي كايعني “دور سلالة معينة في السلطة والحكم”، وأنه ما عندو علاقة بالدولة في مفهومها الحالي، يعني مصطلح Etat لسبب أساسي، هو أن الدولة عندنا بكري كايعني “الدوران والتناوب علىالسلطة” من قبل العائلات القبلية الكبرى في البلاد، وما كايعنيش “كيان قانوني وسياسي مجرد” عندو حدود إقليمية وحكومة معترف بها دوليا، وشعب قار ومستقر فوق هاذا الإقليم..
في هاذ الحلقة غادي نشوف معاكوم قضية مصطلح أخر للي كانت الدولة المغربية كاتاخذ منو “الشرعية السياسية” ديالها باش تحكم المغاربة وتحافظ على شوية ديال الاستقلال بالنسبة للدول للي بعيدة منها…هاذ المصطلح كايهم ما سمي بالخلافة…

مللي كاتتصفح المصادر التاريخية للي سبق ليا تكللمت عليها، كايبان ليك بللي “الحاكم المغربي” كان كايحدد المكانة ديالو السياسية إما ك “أمير”، أو “كسلطان أمير المسلمين” أو ك “خليفة أمير المؤمنين”…وهاذ التحديد ديال المكانة ديالو كان كايتم انطلاقا من القوة القبلية والعسكرية للي كايتوففر عليها في الواقع، ومن معايير خرى غادي يجي الوقت للي غادي نتكللم عليها…فالحاكم المغربي إيلى كان غير على قد الحال، كان كايقنع بمكانة الأمير…ومللي يكون متمككن من الأرض ومن القوتين العسكرية والقبلية، كان كايزعم وكايتسمى “أمير المسلمين”، وفي الأقصى كايسمي راسو “خليفة وأمير المؤمنين” في مواجهة المركز المشرقي ديال الخلافة إما عباسية أو تركية…
وعليه نقدرو نكًولو بللي السلالات المغربية من الأدارسة حتى للعلويين الحاليين، كانو يا إما:
– كاياخذو شرعيتهوم السياسية من خلافة ذات طابع مشرقي بعيدة عليهوم بحال خلافة بني العباس، أو قريبة منهوم بحال خلافة بني أمية في إسبانيا، أو الخلافة الفاطمية الشيعية في تونس الحالية…
– أو كايزاوجو بين التبعية لمركز خلافة بعيد وغريب عليهوم، وفي نفس الوقت كا يتغططاو بشرعية خاصة بيهوم باش يتتقيو شر هاذ المراكز…والسلالات للي مشات في هاذ الطريق هي دولة المرابطين ودولة بني مرين..
– أو كايديرو شرعية مستقلة على مراكز الخلافة الأخرى، وكايبانو لحلفاؤهوم وللمنافسين ديالهوم على أنهوم “خلفاء” بالتمام والكمال بحال عند الدولة الموحدية ولا عند دولة السعديين والعلويين !!
إذا كايبان ليا من هنا، أن الشرعيات السياسية للي وظظفاتها “الدول” والسلالات المغربية هي ثلاثة أنواع أو أنماط: كاينة السلالات للي موالية لشرعيات أجنبية، وكاينة سلالات للي استاندات على شرعية مزدوجة أجنبية/محلية، وكاينة سلالات ذات شرعية ذاتية/محلية…

ولكن قبل ما نباشر هاذ الأنماط بثلاثة من طرق وأساليب إضفاء الشرعية السياسية على الدول والسلاطين ديال المغرب، لابد ما نتوققف شويا على آشنو هي هاذ “الخلافة” للي كانو السلاطين ديالنا كايشوفو نفوسهوم مضطرين أنهوم يحددو مكانتهوم السياسية انطلاقا منها وعلاش؟

آشنو هي هاذ الخلافة الإسلامية؟
السلالات للي يمكن ننعتوها “بالمغربية”، بحال “دولة الأدارسة”، ولا “دولة بني يفرن” ولا “دولة بني أبي العافية” ولا حتى “دولة المرابطين”، كانت دائما، باش تضمن لنفسها الأمان والسكينة والدوام وتحمي نفسها من الاجتياح، كاتستعمل الإديولوجية الرسمية “لدولة أجنبية فيها خلافة إسلامية”…فكانت كاتتصرف تقريبا بحال شي إمارات مستقلة ولكن تابعة لواحد من مراكز الخلافة للي موجودة في بغداد، أو في القيروان، أو في الأندلس…
وعليه باش نتناولو مسألة الخلافة، لا بد لينا مانستحضرو جوج ديال السياقات للي تخلينا نفهمو مزيان كيفاش الدول المغربية قبل من الموحدين كانت كاتحاول تضفي شويا ديال الشرعية السياسية على نفسها وعلى تواجدها في الحكم…هاذ السياقات هي سياق تاريخي وسياق نظري…
السياق التاريخي…
تاريخيا، يمكن نقولو أنه كانت هناك ثلاثة مراكز الخلافة للي كاتهممني في هاذ الخربشات حول البحث ديال الدول ديالنا المتعاقبة على الشرعية السياسية: الخلافة العباسية، وخلافة الفاطميين، وخلافة الأمويين في الأندلس…غادي نحاول ندوز بعجالة على هاذ المراكز “الخلافية” بثلاثة…
مركز الخلافة اللول: العباسيون في العراق ثم مصر، ثم تركيا...
خلافة بني العباس بدات سنة 750 ميلادية، أي 38 عام من قبل مايدخل إدريس الأول للمغرب ويدير دولتو في وليلي…وهي كاتنتاسب للعباس بن عبد المطلب، العم الأصغر للنبي (ص)…بدات في اللول كحركة سياسية كاتطالب بالسلطة في وجه الأمويين باسم “السلطة لآل البيت”، ومن بعد ما الزعماء ديالها تخللصو من المنافسين ديالهوم للي هوما حفدة علي بن أبي طالب، وتخللصو من الأمويين، بناو الخلافة ديالهوم على ظهور الأجانب العجم للي كانو مضطهدين من طرف الدولة الأموية للي كانت حسب الأدباء والمؤرخين “دولة عربية أعرابية”…خذاو في اللول “الكوفة” و”الأنبار” عاصمة ليهوم، ثم بناو مدينة “بغداد”…
للي بقاو من الأمويين ومن حفدة علي بن أبي طالب، هربوا نحو الغرب…اللولين مشاو لشبه الجزيرة الإيبيرية، والثانين هربوا لليمن (الدولة الزيدية) وللمغرب (الدولة الإدريسية)…
مللي كاتقرا شويا كتب التأريخ، كاتوجد بللي “الخلافة العباسية” كانت في بدايتها قوة عسكرية وسياسية متماسكة متحككمة في المجال الحيوي والمجال الاجتماعي…ولكن مع مرور الوقت، صبحات مجرد “رمز ديني” في الوقت للي الإمبراطورية الإسلامية تحككموا فيها “العناصر الأجنبية الدخيلة” ثم “المماليك”…هاذ “الرمز الديني”، رغم الضعف ديالو السياسي، كانوا السلاطين في الولايات كايحسوا بأنهوم مجبرين على توظيفو في ممارستهم للسلطة…بحيث مللي دخل المغولي “هولاكو خان” لبغداد وهددمها وقتل الخليفة الرسمي “المستعصم بالله” سنة 1258 ميلادية، ناضو “السلاطين المماليك” ودارو واحد من حفدة الخليفة “المستعصم بالله” خليفة عليهم في مصر كرمز ديني للخلافة الإسلامية…وعليه بقات الخلافة العباسية واقفة على رجليها حتى 1519 ميلادية مللي دخلات الجيوش العثمانية لمصر، بحيث تنازل الخليفة العباسي عن اللقب ديالو لصالح “سليم الأول” العثماني للي اصبح “خليفة” وحوول مركز الخلافة الجديدة إلى “القسطنطينية !!
وعليه، فالحكام في المغرب، بحالهوم بحال جميع السلاطين في الإمبراطورية الإسلامية، كانو مجبرين أنهوم يحددوا موقفهوم تجاه هذا المركز الأول إيلى بغاو يحكموا، وإيلى بغاو يعطيو لسلطتهوم شويا ديال الشرعية السياسية…
ولكن عنداكوم، تحديد الموقف ماكانش بالضرورة القبول والتماهي معا هاذ الخلافة، بل كان في بعض الأحيان كايتجسسد في الرفض لهاذ الخلافة، إما باللجوء لمركز “خلافي آخر”، أو بإعلان “خلافة مغربية” بالتمام والكمال !!

موضوعات أخرى

29/03/2024 10:40

جدل امتحان البيرمي.. “نارسا”: كاين تطور إيجابي فنسبة نجاح المترشحين فاليوم الرابع ووصلات لـ54,41 فالمية

29/03/2024 10:30

بلقشور: الوداد تحملو مسؤوليتهم والجموع العامة دازت مزيان وتم التصويت على گاع التقارير ومبروك عليهم

29/03/2024 10:21

تقرير رسمي: أسعار الصناعات الغذائية فبلادنا تراجعات وإنتاج وتوزيع الما والضو مستقر

29/03/2024 10:00

دقة تابعا دقة فـ”قضية تمويل فرحان” مول الشروق. بوصوف كان غادي يدير درس حسني قدام سيدنا ويقدم كتابو ليه وحيدوه

29/03/2024 09:50

ماتش الكوكب والحسنية.. تابعوه 20 ألف واحد وولاية أمن لمدينة لحمرا سخرات 1270 بوليسي وها شحال تشدو

29/03/2024 09:42

السينمائيون يهاجمون بنسعيد: كاين تراجع فالمكتسبات للي تحققات فحكومات سابقة وخاص حوار جاد ومسؤول باش نتجاوزو الأزمة

29/03/2024 09:15

الوداد طواو صفحة الناصيري وطلعو البرناكي كرئيس 20 فتاريخ النادي ودارو مليون للي بغا ينخرط