كود هناء ابو علي ////

عبد الاله تهاني مدير الاتصال والعلاقات العامة بوزارة الاتصال واللي كيوهم الناس باللي محمي من قبل لمريني الناطق الرسمي باسم القصر الملكي ومؤرخ المملكة واخا هاد الشي ما صحيحش٬ دار بيان كذب فيه. البيان بخصوص ما نشرته “كود” عن تورطه في اهانة المغرب والتدخل في شؤونه الداخلية خلال دعوة لحضور احتفالات العيد الوطني للامارات.

تهاني اللي عرض على الصحافيين عكس ما يدعي واللي مشى معاه ايت بوسلهام اللي خدام فسفارة الامارات بالمغرب وبقدرة قادر ولى نائب الرئيس الثاني ففيدرالية كمال لحلو للاعلام واخا ماشي صحافي واخا القوانين الجديدة كتمنع الجمع بين الصحافة والتواصل. السيد عندو وكالة فهاد الميدان٬ قلنا عرض على الصحافيين٬ ناض دار بيان قاليك حنا ف”كود” كتفتاريو عليه ونتجاو عليه. طبعا هاد الشي كذوب.

مع الوقت كيبان هاداك الوفد الاعلامي كان ضحية نصب بلا ما يشعر. اللي كيعرف هادوك ما يمكنش يقبلو تدخل دولة بحال الامارات فشؤوننا الداخلية. هاد السيد مشى ووقع اجتماع مع كل مدير من المدراء الست واستنطقو واحد فيهم حقاش دار فيهم باش جبدو ليه الاسلاميين فالمغرب. علاش كنقولو تقولبو هاد المدراء الست حقاش باش يشوفو معاهم مسؤول بوزارة الاتصال ما يمكنش يتصورو باللي هاد الدولة ديال الامارات تقدر تتدخل فالشؤون الداخلية للمغرب. طبعا فهاديك اللقاءات الفردية جبدو مسؤولين اماراتيين حزب العدالة والتنمية كجزء من التنظيم العالمي للاخوان المسلمين وخاص يتم مواجهته. هنا بانت دولة الامارات بشكل متخلف. دخلات بوقاحة فشؤوننا الداخلية.

اش دار هاد السي التهاني. والو قبل٬ وفق مصدر ل”كود”٬ هدية عبارة عن ساعة غالية ثمنها شي مائة الف درهم حسب العارفين بانواع الروليكس. ماشي غير هاد الشي شي وحدين كيهدرو علي جوج روليكسات ماشي واحد.

هاد الشي علاش كنقول انو فبيانو ما كانت واضح. بدا كيردد بغباء باللي سفرو “تلبية لدعوة كريمة من سلطات دولة عربية شقيقة”. يمكن السي تهاني سمع خطاب الملك في القمة العربية الاوربية وسمع انتقادو لتدخل شي دول عربية فالشؤون الداخلية لدول اخرى. من هاد الدول كاينة الامارات فحالات معروفة وكاينة قطر وممكن تزاد عليهم حتى السعودية ودول اخرى.

الامارات تعدات كل الاعراف ودخلات فشؤون دولة صديقة شقيقة بحال المغرب.

التهاني كيقول باللي كان فاحترام للاجراءات والضوابط. ما حشمتيش. اش من ضوابط اللي تقبل دولة بحال الامارات تتدخل فشؤون بلادك. اش من واجبات المواطنة اللي تقبل هاد الشي وفوقها تقبل هدية. واش هاديك الهدية باش رجعتي حطيتيها فالوزارة ايلى كنتي كتبغي بلادك. بلا ما نهدر على فلوس الجيب. هاديك قصة اخرى نرجعو ليها مستقبلا.

علاش كتهدر باللي ما كانش تدخل وعندنا فكود شهادات من مدعويين عكس ما تقول. هاداك وجهك هاداك.

هاد الشي عندو 15 شهر كتقول وسيدي استدعاء المغرب لسفيرو واش كتصحبو علي قضية ربورطاج العربية اللي كتبث من الامارات وفيه اعتراف بالبوليساريو٬ صافي. اللا راه على تصرفات على تدخلات فشؤوننا الداخلية. المغرب كيف بين رئيس الدولة واضح فسياستو الداخلية. مستقل لا على السعودية لا على الامارات لا على قطر. مستقل حقاش المغرب مغرب ما عندو علاقة بالمشرق. هاديك الدولة ماشي شقيقة باش تورطات فعملية وانت فراسك هاد الشي حقاش تجبدات فالهدرة.

مدراء النشر فالاخير ضحية حضورك. كون ما كنتيش كون عندهم تصرف اخر مع هاد الامارات. هادوك معروفين بالوطنية بالوضوح فالمواقف.

هاديك الرحلة راه كود خرجات غير شوية منها. احتراما للبلاد ماشي لامثالك.