گود سبور//

كشفو باريس سان جرمان الفرنسي على جديد الحالات الصحية ديال اللاعبين اللي موعتين لهم، ومن بينهم النجم المغربي اشرف حكيمي اللي رجع يتريني فـ لاصال د النادي، وسط أمال المغاربة ان النجم المغربي يقدر يشارك فـ كاس افريقيا “المغرب2025” مع المنتخب المغربي من الاول ديال البطولة.

ووضحو باريس سان جرمان اليوم الجمعة فـ بلاغ للنادي، أن اشرف حكيمي خدام فـ البرنامج التأهيلي الفردي المخصص له من طرف الطاقم الطبي والتقني للنادي.

وقدر اشرف حكيمي يحيد البروطيج الطبي اللي كان لصقو له الطبيب ملي توعت فـ ماتش باريس سان جرمان وبايرن ميونخ فـ دوري ابطال أوروبا، بعدما ضربو الكولومبي لويس دياز، وقدر نجم المغربي يحيد حتى الطروتينيت اللي كان كايتعكز بها باش يقدر يمشي.