كود-Nasa //

بزاف ديال الناس كيتساءلو كيفاش رجعات المركبة ديال Orion من القمر فمهمة Artemis 2 ، ودخلات للغلاف الجوي بسرعة كبيرة، ومع ذلك ما تحرقاتش؟

الجواب كيبدا بالدرع الحراري ديالها لي مصنوع من مادة خاصة سميتها AVCOAT، وهي بحال بونج فيه بزاف ديال الفراغات الصغار ، و ملي كتوصل الحرارة لدرجات خطيرة بزاف (حتى لـ 2700 درجة مئوية)، هاد المادة ما كتقاومش، بالعكس كتبدأ كتبخر بشوية، وكل جزء كيتبخر كيدي معاه الحرارة وكيبعدها على المركبة، بهاد الطريقة الوسط كيبقى محمي.

الحاجة الثانية هي زاوية الدخول للغلاف الجوي، وهي مهمة بزاف حيت إلا كانت صغيرة ، المركبة تقدر متختارقوش و ترجع للفضاء، وإلا كانت كبيرة بزاف، الحرارة تولّي كبيرة ، داكشي علاش أوريون دخلات بزاوية مضبوطة بين 5 و7 درجات، الشي لي  خلا الغلاف الجوي ينقص السرعة ديالها تدريجياً بلا دخول قوي ، وخا أنها كانت غادية بسرعة قريبة ل 40,000 كيلومتر فالساعة.

ثالث حاجة، المركبة ماغادياش بموطور ولا فرانات فهاد الوقيتة غير الجاذبية ديال الأرض والاحتكاك مع الهواء هما اللي خدامين، ومنين دازت المرحلة الأخطر ديال الحرارة، تحلو المظلات الصغار باش يتقلوها، ومن بعد تحلو 3 كبار و نقصو من السرعة حتى ولات تقريباً 30 كيلومتر فالساعة.

وفالأخير، هبطات المركبة بسلام فالمحيط الهادئ، فواحد المنظر اللي بان بحالا شعلة شاعلة المركبة فالسما، ولكن فالحقيقة كان رجوع محسوب مزيان من ناسا .