الرئيسية > آش واقع > السدان ديال محطة ولاد زيان باقي مطول. العمالة أكدات أنه “كاينين تعليمات ومايمكنش تحل دابا”.. ونقابي لـ”كَود”: مجلس المدينة هو المسؤول
11/06/2021 18:00 آش واقع

السدان ديال محطة ولاد زيان باقي مطول. العمالة أكدات أنه “كاينين تعليمات ومايمكنش تحل دابا”.. ونقابي لـ”كَود”: مجلس المدينة هو المسؤول

السدان ديال محطة ولاد زيان باقي مطول. العمالة أكدات أنه “كاينين تعليمات ومايمكنش تحل دابا”.. ونقابي لـ”كَود”: مجلس المدينة هو المسؤول

عفراء علوي محمدي – كود //

حاولو المهنيين بالمحطة الطرقية فولاد زيان التواصل مع عامل عمالة الفداء مرس السلطان بشأن استمرار إغلاق محطة ولاد زيان فكازا، بعد سنة ونص تقريبا من انتشار فيروس كورونا المستجد، على الرغم من فتح جميع الطرقات فمختلف ربوع المملكة وكذلك المحطات الطرقية.

المهنيين كيقولو أنهم ماستطعوش يتواصلو مع المسؤولين المحليين، هادشي علاش تقدمو بطلب للمحكمة الإدارية باش تكلف مفوض قضائي للقيام بهذ المهمة، خصوصا وأن وضعيتهم المادية تدهورات وتأزمات بزاف بسبب تداعيات الإغلاق طيلة هذ المدة.

وكشف مصطفى لكيحل، الكاتب الوطني للمكتب النقابي للنقل الطرقي بالمغرب، أن العمالة فردها على المفوض القضائي أكدات أن قرار إغلاق المحطة غادي يبقى ساري المفعول إنطلاقا من مقتضيات القانون اللي وضعاتو الحكومة بناء على حالة الطوارئ الصحية اللي كتعرفها البلاد، وأنه كاينين “تعليمات فهذ الصدد على المستوى المركزي”، ومايمكنش تحل دابا حتى لإشعار آخر.

لكيحل: مجلس المدينة هو المسؤول على الإغلاق وبغينا توضيح رسمي.

وفتعليقو على استمرار سدان المحطة، كيشوف لكيحل أن مجلس المدينة هو اللي كيتحمل المسؤولية المباشرة فهذ الإغلاق، اللي قال أنه ماشي مبرر وماعندو حتى داعي، خصوصا وأن جميع المحطات فالمغرب محلولة.

وزاد لكيحل، فتصريحو لـ”كَود”: “صحيح أن الإغلاق جا نتيجة قرار حكومي من أجل منع التنقل بسبب وباء كورونا، ولازال القانون ساري ومفعل، وتعطات صلاحية الإغلاق للسلطات المحلية، وهكذا فالقنوات القانونية كتلغي كل المقررات القضائية”، لكن “المجلس هو اللي شاد سوارت المحطة، وهو اللي ضاغط باش تبقى مسدودة”، على حد تعبيرو.

وكشف المسؤول النقابي أن المشكل كان قبل الجائحة، بحيث عطا مجلس المدينة تحويل لاستغلال المحطة من طرف الشركات وتأهيلها وإصلاحها، بحكم أن الشركة السابقة كان عندها مشكل معاه، ومابغاش يجدد معاها العقدة، فما كان لين من بعد غير يتكلف بيها هي قبل ما يعطى التفويض لشركة أخرى، حتى جا قرار الإغلاق.

وبرر لكيحل طرحو بأن جميع المرافق فكازا الآن خدامة، وكاين السماح بالتنقل، وشركات نقل كثيرة خدامة بشكل طبيعي، “إذن فاش كاترفع السلطات يدها على المرافق كلها، فعلاش غير المحطة هي الوحيدة اللي سادة؟ إذن مجلس المدينة هو المسؤول، ولحد الساعة ماكاين حتى توضيح على الغاية من هذشي، وواش بغاو يصلحو المحطة أو يعدلو من مرافقها وهياكلها باش تولي ملاىمة لتطلعات المواطنين، أو يحولوها لمكان آخر…”، على حساب هضرتو.

وطالب المسؤول النقابي مجلس المدينة بالتوضيح عن طريق بلاغ رسمي، “وانا كنوجه اصابع الاتهام لمجلس مدينة كازا، وطبعا راه كاينة حلقة تربطه بالسلطات المحلية، والمجلس هو مؤسسة منتخبة، مسؤول دستوريا وكيمثل الشعب وخصو يجاوب البيضاويين والمغاربة ويعطي رؤية واضحة”، كيف قال لكيحل.

أبو الرحيم: السلطات العمومية هي المسؤولة على الإغلاق والجماعة غير كتنفذ

فردو على هذ الكلام، قال محمد أبو الرحيم، نائب رئيس مجلس مدينة الدار البيضاء المكلف بالنقل والسير والجولان، أن هذ القرار ماشي المجلس اللي خداه، بل “هذشي بقرار ديال السلطات بناء على حالة الطوارئ الصحية،  ومن نهار تخاذ قرار الإغلاق ديال المحطة لحد الساعة ماعندناش قرار الفتح، بالعكس حنا ماكرهناش نفتحوها من غدا، لكن حنا كنطبقو قرار السلطات العمومية من بعد بلاغ رئيس الحكومة ديال الطوارئ والإغلاق”، على حساب تعبيرو.

وأكد محمد أبو الرحيم، فتصريحو ل”كَود”، أن المجلس كايطبق كل تعليمات وزارة الداخلية وقراراتها فتدبير المرفق العمومي فهذ الجائحة، وهي المسؤولة على القرار، حيت “نهار الوزارة قررات بأن النقل العمومي خاصو يكون بنسبة 50 فالمية، حنا فرضنا على الطوبيسات والطرام هذ النسبة. نهار السلطات العمومية سدات المحطة تسدات، والأمر كينطبق حتى على قرارات إغلاق المقاهي والمطاعم والمسارح وغيرها”، كيف قال.

ونهار غادي تقرر السلطات العمومية تفتح المحطة غادي تفتحها، حيت حسب المسؤول الجماعي، “هذا مرفق كتدبرو جماعة الدار البيضاء نعم، لكن الجماعة عندها شركاء، منهم وزارة النقل والسلطات المحلية، وكتلتزم وتمشي مع القوانين الجاري بيها العمل فالبلاد، وهذا قرار حكومي عندو علاقة بحالة الطوارئي الصحية اللي كتعرفها البلاد.”، كيف قال أبو الرحيم.

وزاد: “السلطات العمومية هي المسؤولة على الإغلاق، جا القرار ديال وزارة الداخلية قال أن محطة ولاد زيان غتغلق فتغلقاتش، أنا ماعرفتش حالات باقي المدن لكن لحد الآن مازال ماعندناش شي قرار من الحكومة باش نفتحو، بالعكس حنا ماعندنا حتى مشكل”.

موضوعات أخرى

16/06/2021 10:00

شوهة.. طيارة ديال “لارام” جاية من كازا وغادية للعيون خسرات ف مطار لاس بالماس والمسافرين كاعيين على الشركة – تصاور

16/06/2021 09:00

ابو زعيتر شابع سفريات برا ومصور كيتبوزق فطيارة خاصة.. وسيطايل عطاتو علاش كيقلب: باز للي ما كيحشم.. المغاربة حاصلين ومكرفصين وهادو كيتساراو فجيت بريڤي! تفو!

16/06/2021 08:30

ممثلي جهات الصحرا ف اللجنة 24 للأمم المتحدة: أقاليمنا الجنوبية كاتعيش نمو اقتصادي كبير والحكم الذاتي هو الحل المناسب