الرئيسية > كود-تيفي > الفيلسوف الفرنسي كونت سبونفيل: أنا مخايفش من كورونا حيت نسبة الفتك ديالو ضعيفة بزاف.. وخاصنا نهتمو بمستقبل ولادنا كثر من حياة الشراف والمتقاعدين.. واللومة على الإعلام اللي كيخلع الناس – فيديو
09/09/2020 16:00 كود-تيفي

الفيلسوف الفرنسي كونت سبونفيل: أنا مخايفش من كورونا حيت نسبة الفتك ديالو ضعيفة بزاف.. وخاصنا نهتمو بمستقبل ولادنا كثر من حياة الشراف والمتقاعدين.. واللومة على الإعلام اللي كيخلع الناس – فيديو

الفيلسوف الفرنسي كونت سبونفيل: أنا مخايفش من كورونا حيت نسبة الفتك ديالو ضعيفة بزاف.. وخاصنا نهتمو بمستقبل ولادنا كثر من حياة الشراف والمتقاعدين.. واللومة على الإعلام اللي كيخلع الناس – فيديو

عفراء علوي محمدي- كود//

الفيلسوف الفرنسي أندري كونت سبونفيل، اللي صدر مؤخرا “المعجم الغرامي ديال مونتيني”، عندو موقف مختلف من فيروس كورونا المستجد، وعلن بالتالي أنه ماخايفش منو، واعتبر أن “كوفيد 19” مكيقتلش نسبة كبيرة من الناس، وكاينة أمراض أخرى أكثر فتكا منو.

ووضح كونت سبونفيل، فبرنامج على هذ إذاعة RTL الفرنسية، “أنا كنقول أنني ماخايفش من “كوفيد 19″، لأنه مرض كيقتل 0,5 فالمية من الناس المقيوسين، واخا أغلبيتهم فالسن ديالي أنا اللي فعمري 68 عام، لكن ماكاينش سبب باش تخلع، تموت بالكونصير أو بكورونا او بشي مرض آخر راه ماكاينش فرق، لكن باش تعيش فبلاد مسيطر عليها الخوف، وولادك لابسين الكمامات ومايتباوسوش ومايتعانقوش، هذا هو المشكل الكبير”.

وأكد كونت سبونفيل أنه خاص تفكر لمستقبل الوليدات الصغار وتحرص باش يعيشو حياة مزيانة أكثر من حياة الشراف: “أنا كنهتم بولادي وبصحة ولادي أكثر من صحتي، كاين اللي غيقول انا كنطالب بأنهم يخليو الكبار يموتو بلا رعاية، لا هذشي ماكاينش، لكن فجميع الأحوال الكبار كيضحيو على الصغار كثر من تضحية الصغار على الكبار، هذشي عادي، أي أب وأم يعطيو حياتهم على ولادهم، ماشي الولاد يعطيو حياتهم على واليديهم، راه مايمكنش هذشي، إذن إلى حمينا الشراف، اللي كننتامي ليهم أنا، راه غادي نضحيو بجيل كامل.. ناخدو على سبيل المثال الحالة دالمدرسة، يدار درس بالكمامة فقسم فيه 30 وليد، من 12 حتى ل13 لعام، راه هذشي مريب، هكذا كيتفقد التركيز والفهم والتبادل ومشاركة المعارف، بلا مانتكلمو على الانضباط اللي مكيبقاش وكيولي منحصر غير فالتباعد والكمامات، إذن واش نضحيو بالتربية والتعليم ديال وليداتنا من أجل الشراف؟ وبالنسبة لمرض اللي كيقتل 0,5 ديال الحالات؟ ماشي معقول !!”.

وبالنسبة لنسبة فتك “كوفيد 19″، فكيشوف كونت-سبونفيلي أنها أقل من نسبة الوفاة السنوية، بحيت كيقول أن أكثر من 600 ألف واحد كيموت كل عام ففرنسا، بينما غير 30 الف واحد مات بكورونا، وهذ الرقم مكيتطورش بزاف، وكيشكل فقط 5 فالميو من مجموع الوفيات و”30 الف رقم عالي وحزين، لكن مكيعنيش نهاية العالم إلى ماتو كَاع هذ الناس”، على حد تعبيرو.

واعتبر الفيلسوف الفرنسي أن هذ الخوف اللي مزروع فالناس ماشي خطأ السياسة، بل خطأ الإعلام بالدرجة الأولى، وخوف الناس المتزايد: “ولو أنا كنت فبلاصت الرئيس الفرنسي إيمانويل ماكرون كنت غندير نفس الشي، حيت كاين الضغط ديال المنظومة الطبية، والضغط ديال الإعلام، وعاد خوف الناس المتزايد، وإلى ماكرون قرر مايكونش الكونفينمون، غيولي ميت سياسيا، وتكون النهاية ديالو ومايعاودش يحكم، وبالتالي ماعندوش خيار آخر، حيت منين الصحة كتولي هي همنا الوحيد وكنضحيو بمستقبل ولادنا، باش نحميو شوية ديال الصحة ديال المتقاعدين، كنشوف بأن هذشي ماشي معقول، وهذشي كيبكي”، على حساب هضرتو.

وقال أن طريقة معالجة الإعلام لكورونا خاصها تتبدل: “لو أنهم كانو كيتحطو كل عشية الارقام دالناس اللي كيموتو بالكونصير مع اللي كيموتو بكورونا، حيت كل عام كيموتو 150 الف واحد بيه ففرنسا، وهو رقم أكثر بكثير من كورونا، ثم ارقام على الوفيات والجلطات الدماغية والأمراض الأخرى، ماكانوش الناس غيتخلعو بزاف، حيت الإعلام دورو الإخبار ماشي التخويف”.

وأكد أن قراءة أعمال مونتيني ممكن تخلي الإنسان يحل عينيه على بزاف دالأمور، بحيث من أهم الأقوال اللي قال أن “أكثر حاجة كنخاف منها كثر هي الخوف”، و”ماكتموتش بداكشي اللي نتا مريض بيه، كتموت بداكشي اللي عايش بيه”، بمعنى أن الموت جزء من الحياة، وكيخصنا نتقبلوه.

ومونتيني، كيف قال كونت سبونفيل، عاش فعصور دموية بامياز قربات فيها نسبة الموت ل100 فالمية، بحيث عاش فعصر الطاعون، وكانت حرب الديانات اللي مشاو فيها عشرات الآلاف دالموتى فهذ المرحلة و100 آلاف الموتى عبر السنوات، أما كورونا فمعدل الفتك ديالو ففرنسا كيتأرجح بيه 0,3 و0,5 فالمية من الناس اللي مراضين بيه.

وهذا رابط المقال الاصلي :

https://www.rtl.fr/actu/debats-societe/je-n-ai-pas-peur-de-la-covid-19-assure-le-philosophe-andre-comte-sponville-7800785617?fbclid=IwAR2iQZGAw5J6oR3soR3sfGwW1zmbpY9Z9G7snvFFLX0ZU98Kr6o6eiDZgXY

موضوعات أخرى

21/09/2020 20:30

روبرتاج.. ها كيفاش خطط الدخيسي للقضاء على الجريمة فأحياء فاس اللّي دوّز فيها اكثر من شهر وزاد حتى لمناطق قروية حدا لمدينة وها علاش ركّز