كود مكناس ////

بلاصة لبگر ولغنم والماعز وحتى الدجاج فالمعرض الدولي للفلاحة بمكناس ديما كيكون عليه اقبال كبير من الزوار. هاد الدورة 16 ف2024 ما خرجاتش على القاعدة. اللي كيسميوه “قطب تربية الابقار والمواشي” فيه الرواج. “كود” كنا تبعنا مسابقة من مسابقات كثيرة مخصصة للبگر. ختارت هادي يومين بگرة من تاردوانت احسن بقرة حلوب فهاد الدورة. هادي تابعة لتعاونية “كوباك” اللي كيصايب ماركة “جودة” فالحليب والرايب وخوتو. 

المسابقة راه ما كانتش ساهلة. راه كانت 134 راس من هاد النوع

“كود” رجعات تلاقات مع هاد البگرة او مع اللي مكلف بيها وبخواتاتها. المشرف عليها واللي كان معاها ودار بيها دورة نهار ختارتها لجنة التحكيم قال ل”كود” بللي هادي بگرة عاگلة ماشي شي وحدة عندها ميزاج صعيب. وشرح ل”كود” باللي بعض المرات كتقلق “ما مولفاش هاد العدد لكبير ديال الناس”. 

هاد البگرة اللي كيتحلب يوميا 60 ايطرو كتكلف بيه الشركة المالكة ليه وكتعالجو باش ما يخسرش٬ ما عندهاش سمية. ماشي غير هي حتى البگرات لخراين ديال الكسابة لخراين ما عندهم اسماء. بگرات نكرة. دابا خاص مستقبلا فمعرض الفلاحة يتفرض على كل مربي مشارك يختار اسم للبگر او التيران ديالو اللي مشاركين فمسابقات. 

المكلف بالبگرة اللي ربحات واللي كينقلي ليهم فين باركين واللي كيعلفهم بالتبن وغيرو قال ل”كود” باللي كتطلع هاد البگرة الفائزة باحسن بگرة حلوب بمائة درهم يوميا. ثمن قليل بزاف مقارنة ب60 ايطرو حليب. ثمنها فالسوق ما بين 3.5 مليون و4 مليون سنتيم. 

قريب من هاد البگرة الفائزة اللي كانت متكية على التبن كانت العجلة اللي ربحات فمسابقة احسن عجلة. من نفس التعاونية “كوباك”. بجوجهم رودانيات. 

وفالجهة لخرى تلاقات “كود” مع البگرة الحمداوية =نسبة الي بن احمد باقليم سطات= اللي جات الثانية فمسابقة البقرة الحلوب. هادي مرگدها فمگارطو القريب من هاد لمدينة. حتى هي =البگرة= ما عندها سمية. 

اللي ربحو فهاد الجوائز باقي ما عارفينش قيمة الجائزة كيف قالو ل”كود”. 
غير بعيد على هاد لبگر كان جناح للثور. كاينة مسابقة لاحسن ثور فيه اللحم بزاف. واحد من اللي مكلف بالعناية بهاد الثيران قال باللي الفائز٬ وقدم ل”كود” واحد٬ فيه الف و700 كيلوغرام. هادا ديال “الدومين” ديال سيدنا. فهاد المسابقة شارك 90 راس