كود سبور//

اكدت أستاذة القانون فتيحة الطالبي والباحثة فالقانون الرياضي الدولي، أن التهديدات ديال الاتحاد الجزائري لكرة القدم واتحاد العاصمة، بأن الأخير ما يلعبش ماتش روتور كأس الكونفدرالية الإفريقية ضد نهضة بركان إذا الأخير دخل بتوني فيه خريطة المغرب، كتبقى غير هضرة وصافي إذا ما لعبوش غيتعرضو لعقوبات ثقيلة تقدر توصل حتى للمنتخب الجزائري الأول.

وفتصريح لميكرو “گود”، وضحت فتيحة الطالبي شنو كيتسنا اتحاد العاصمة إذا ما لعبوش الإياب مع بركان، وقالت: “التوني ديال نهضة بركان اللي فيه الخريطة ديال المغرب معتمد من عند الكاف، وإذا نساحبو اتحاد العاصمة كيفما كيقولو فالتهديدات ديالهم، راهم غايخسرو تاني بنتيجة 3 لزيرو لمصلحة نهضة بركان”.

وكملت الطالبي: “الأمور واضحة وباينة، راه نهضة بركان مطبقين القانون من الأول والجزائريين مخلطين السياسة بالرياضة، وغتعطاهم حتى عقوبات وغرامات مالية كبيرة حيث تسببو فأن الماتش ما تلعبش وهذا الشي خلق مشكل مع مستشهرين الكاف، وتقدر توصل العقوبات حتى الأندية الجزائرية والمنتخب الجزائري الأول”.