كود سبور//

غيسافر فريق الرجاء الرياضي باش يلعب ضد فريق فايبرس الاوغندي بأوغندا السبت الجاي، برسم الدورة 5 من ليكروب ديال عصبة أبطال إفريقيا لكرة القدم، مرة أخرى غيكون السفر متعب ومسخسخ عند الفريق حيث غيمشي فرحلات عادية وماشي مباشرة.

وحسب مصدر مطلع، فرحلة الرجاء الرياضي إلى أوغندا غتبدا غدا الخميس، والفريق غينطلق من مطار محمد الخامس بالدار البيضاء إلى مطار تونس ومن تونس إلى مطار الدوحة عاد غياخذ الطائرة اللي غتمشي لاوغندا، ونفس العملية غيديرها الفريق فرحلة الإياب إلى المغرب، بسبب الضغط اللي كاين حاليا على الرحلات اللي كتدوز للخليج حيث كاين موسم العمرة، والفريق غيلقى راسو كطير من مطار لمطار حيث رئيس النادي عزيز البدراوي عجز أنه يوفر طائرة خاصة تسافر بالخضار نيشان من المغرب لاوغندا.

الرحلات الثالث ديال الرجاء فليكروب بعصبة أبطال إفريقيا هذا الموسم، كلها كانت عادية ماشي خاصة وكانت متعبة وشاقة للفريق وأثرت على مستواه، حيث الرئيس ديال النادي عزيز البدراوي عجز على توفير طائرة خاصة تسافر بالخضار إلى الادغال الإفريقية وتجنب اللاعبين عياء وتعب الديبلاصمون، وهادشي كل بسبب تكاليف الرحلات الخاصة وكراء الطائرة اللي مقادرش عليها الرئيس.