كود طنجة ///

البارح فاتح فبراير 2023 كان افتتاح كأس العالم للاندية بالملعب الكبير بطنجة. وكالة المغرب العربي للانباء قالت عليه باللي كان “استثنائي وباهر” وباللي “مزج بين الحداثة والتقاليد المغربية العريقة”. الحفل قدم جزء من تاريخ لبلاد من خلال تقديم وصلات غنائية تراثية فنية من شمال المغرب حتى جنوبو ومن شرقو لغربو. هدر على المغرب فالماضي والحاضر.

حضر بيلي وحضر بن بطوطة وحضر الركراكي. 

هاد الشي دار ماشي بفضل يوسف بريطل المخرج اللي على قد الحال ومستشار مهدي بنسعيد وزير الثقافة ولا حتى بفضل ابراهيم مزند اللي خاشي شريطو فكلشي وولى كيقدم راسو خبير. ابدا. السينوگراف ديال الافتتاح اللي عطاه داك الشكل هي فريق عمل جا من فرانسا. خدم فوقت قصير مع شي ايطاليين باش يقادو هاد الافتتاح. 

طبعا جابو هاد بريطل ومعاه مزند وكل واحد كيعرف شي وزير٬ باش يقولو لينا راه ابداع مغربي. 

فالمغرب كاين سينوگراف واعرين مزيانين وكاين كوريگراف قافزين يمكن ماشي فافتتاح موندياليطو ولكن ماشي صحاب الوزرا مزند وبريطل. اللا. 

علاش كنحسسو بالنقص. ايلى ما عندناش اختصاص نجيبوهم من فرانسا واسبانيا واي دولة بلا ما نخليو بحال بريطل يتصال بصحابو البارح يقول ليهم كي جاكم الافتتاح بحال ايلى هو اللي دارو

الافتتاح خداتو “افان سين” واخا ما عمرها دارت شي نشاط رياضي. هاد الشركة ولات كتحتاكر واحد العينة من الانشطة منظماها الدولة ولكن الشركة جابت للي يقدر يقاد افتتاح ف13 يوم. زططات راسها