سعيد الحسوني – كود سبور//
هاد الصباح ديال الجمعة دوات بزاف ديال المنابر الصحفية الرياضية فسبانيا على رغبة البارصا باش تجيب النجم المغربي حكيم زياش هاد الشهر فسوق الانتقالات الشتوية.
البارصا بغات تستغل الفرصة وتجيب زياش بأقل ثمن، خاصة ملي عرفات أن تشيلسي جابت هاد الصيمانا ثلاثة ديال اللاعبين كيلعبو فالهجوم وهوما مادويكي من إندوفن ومودريك من شاختار وجواو فليكس من اتليتيكو وهذا كيلعب فالبلاصة ديال زياش.
مع هاد اللعابا الجداد اللي جابت تشيلسي غدي يصعاب على زياش يلقى بلاصتو، وزيدون قبل ما يجيو ماكانش كيلعب رسمي سواء مع هاد المدرب “غراهام بوتر” او مع الألماني “طوماس تاشل” اللي كان معاهم.
البارصا خاصها تنافس مع فرقات اخرى باغية تجيب زياش، بحال ميلان أو نيوكاستل وأستون فيلا اللي بدات الاتصالات معاه، خصوصا بعدما زاد تشهر فالمونديال مع التألق الكبير للمنتخب المغربي اللي وصل لنصف نهاية كأس العالم.
هاذي المرة الثالثة فاش كتبغي البارصا تجيب زياش، هو عاجب الإدارة التقنية حيث اللعب ديالو مواتي مع اللعب ديال البارصا، كانوا بغاو يجيبوه من 2020 لكن تشيلسي خلصات كثر وحتى فيناير الفايت اتصلوا به باش يجيبوه مسلف لكن ماتفاهموش، و ولاو جابو اداما تراوري وفيران توريس.
