كود الدوحة ///

فهاد 24 ساعة اللي بقات علي ماتش المغرب ضد البرتغال غدا فربع نهاية كأس العالم قطر 2022 بملعب التمامة ما كاينة هدرة بين لمغاربة هنا الا على التيكيت. من تلفتة لمغاربة مساكن هنا اللي شافوه لابس توني المنتخب وداير بادج كيف ما كان كيعتقادو انو غادي يعطيهم ماشي التذكرة ولكن معطيات تفيدهم.

هاد الصباح سولاتت “كود” مغربية خدامة معلمة اللغة العربية فقطر “عافاك واش انت مع الجامعة” بعد ما شرحت ليها. قالت ل”كود” “كنقلب علي تذكرة لماتش غدا. من البارح وحنا فموقع الفيفا ايلى طلقو شي تذاكر. والو. دابا قرب الماتش وخاصنا وحدة”. 

هاد المعلمة قالت ل”كود” باللي لقات شي تونسي كتعرفو عرض عليها بيي الماتش باكثر من 1200 دولار. اييه السوق السودا منتعشة. 

“كود” سولات مسؤول فالجامعة على سبب تأخر طرح بيي الماتش واخا كان اجتماع بين لمغاربة والفيفا والسلطات القطرية قبل يومين وكان وعد باطلاق عدد من هاد التذاكر. المسؤول المغربي رد على “كود” باللي هو ما بقى فاهم والو.
لكن كيفاش ممكن تلقى تذكرة لهاد الماتش. تقريبا شي 30 بالمائة من لمغاربة اللي جاو يتفرجو فماتش المغرب اسبانيا فثمن النهاية بقاو هنا فقطر وما عندهمش تذاكر حتى هما. 

دابا كلشي كيتسنى الفيفا تطلق اللي عندها باش تقتل اولا السوق السودا. من بعد واش لمغاربة غادي يتفرق عليهم التذاكر؟ 
لحد الان كاينة مؤشرات قوية على هاد الاتجاه. حسب معطيات حصلات عليها “كود” وما بغات لا ينفيها لا يؤكدها لينا مسؤول جامعي فكاينة تقريبا كثر من 4 الاف تذكرة تقدر تكون شراتها الجامعة او قريبة تشريها. ووفق مصادر “كود” فهاد التذاكر مازال نقاش مع السلطات القطرية كيفاش يتوزعو. اللي اكيد هو ما يمكن يتوزع حتى شي تذكرة اليوم 9 دجنبر. ايلى كانت شي حاجة غادية تكون غدا وقبل الماتش بساعات وفبلاصة بعيدة على ملعب التمامة.

الاولوية غادية تكون للالترس. للي كيدير الحماس فالتيران. كنعرفو كاين فقطر شي من الوينرز وشي من گرين بويز”. دابا مفاهمين مزيان كلها فبلاصتو وكاين غير المنتخب. لعداوة تابثة والصواب علي المنتخب يكون. هادو غادي يتفرق عليهم تذاكر. مصادر “كود” ما قالوش كيفاش غادية تم العملية.

السلطات القطرية ما باغياش يوقع ليها اللي وقع فماتش المغرب ضد الصبليون فسطات المدينة التعليمية باش جا عدد كبير ما عندوش تذكرة بناء على اشاعة باللي الدخول يقدر يكون فابور.

كاينة اجراءات اكثر تشدد فماتش غدا. باش تنزل فالميترو ممنوه تركب فالحافلات بلا تذكرة. وغادية تكون مراقبة اكثر تشدد لهاد التذاكر

حديث لمغاربة ما كاين الا على التذاكر. غريب حال شعبنا. كلشي كيقول ليك كيقلب علي البيي وغدا غادي تلقى الملعب كثر من 90 بالمائة مغربي.