وكالات //

صنعات شركة متخصصة فإنتاج ال”آيس كريم” فالشينوا، كَلاص ماكيذوبوش بالحرارة،  هادشي اللي خلا الناس بزاف كيسولو باش بقدر يكون مصنوع وعلاش بالضبط ماكيذوبش.

الثمن ديال هاد الكَلاص غالي بالمقارنة مع أنواع أخرى، وبزاف ديال الناس فالسوشل ميديا هضرو عليه، والإشهار ديالو تشاف أكثر من 500 مليون مرة فموقع “Weibo” الشينوي.

وكيبان فالإشهار واحد السيد كيقرب بريكة شاعلة من الكورن ديال الكَلاص، ولكن ماكيذوبش.

واحد من اللي شافو هاد الإشهار شرا الكَلاص وحاول يذوبو فشومبر واصلة فيه الحرارة ل31 درجة، لكن تحول لمادة لزجة كتلصق وماشي سائلة.

الشركة المنتجة لهاد الكَلاص، اللي كاينة فمدينة شنكَهاي، أكدات بللي صنعاتو بمعايير صحية معتمدة فالوقت اللي بعض المتتبعين مزال  كيسولو باش مصنوع حقيقة وخايفين تكون فيه مواد كتضر بصحة المستهلك.