وكالات //
حسم البرلمان الأوروبي فقرار كيدعم منح وضعية الدول المرشحة للانضمام إلى الاتحاد الأوروبي لكل من أوكرانيا ومولدوفا.
وبعدما سالا التصويت، صرحات رئيسة البرلمان الأوروبي، روبرتا ميتسولا، بللي القرار تحسم فيه “بأغلبية ساحقة”.
وكان رئيس المجلس الأوروبي، شارل ميشيل، قال للصحفيين فوقت سابق البارح الخميس، 23 يونيو، بللي عندو ثقة كبيرة ومتيقن من حصول أوكرانيا ومولدوفا على وضع الدول المرشحة باش يدخلو للاتحاد الأوروبي اليوم.
وكانت المفوضية الأوروبية طالبات من قبل بمنح هاد الوضع الجديد لكل من أوكرانيا ومولدوفا، وتأجيلو بالنسبة لجورجيا.
من جيهتو علن رئيس مكتب الرئيس الأوكراني فولوديمير زيلينسكي، أندري يرماك، فالكونط ديالو فتطبيق “تليكَرام”، أن كييف واجدة باش تنفذ خطة المفوضية الأوروبية الخاصة ببدء المفاوضات على العضوية الكاملة لأوكرانيا فالاتحاد الأوروبي، فالوقت اللي كانت رئيسة المفوضية قالت من قبل بللي خاص أوكرانيا أولا، إيلا بغات تمشي بعيد فإجراءات وطريق الدخول للاتحاد الأوروبي، (خاصها) تنفذ إصلاحات كثيرة فعدد من المجالات، وتسالي مع حكم “الأوليكَارشية” عندها.
