وكالات //
كشف نجم الراي الشاب خالد، أن سبب اختيارو للقب “الشاب” اللي سابق سميتو هي بسباب خلاف وقع بينو وبين أول شخص سجل ليه الأغنية المشهورة “طريكَ الليسي” وهو فعمرو 14 لعام.
الشاب خالد (62 عام)، اللي سميتو الأصلية هي “خالد الحاج إبراهيم”، قال فبرنامج “مع الشريان”، ديال قناة ”mbc”، أن الخلاف كان على الإسم الفني بينو وبين اللي كانو خدامين على إنتاج الأغنية، وكيفاش هو ماكانش كيشوف ضروري يدير شي لقب آخر من غير السمية اللي عطاوه واليديه… ومن بعد نقاش وحوار قال ليه المنتج “ماتقلقش يا شاب”، وتما لقفها خالد وقالهم علاش مانزيدو هاد الكلمة (شاب) على سميتي هكدا “الشاب خالد”؟ ومن تما بدات قصة هاد السمية الفنية اللي غيحيح بيها فالكاريير ديالو وبيها غيتشهر.
الشاب خالد هضر أيضا على مسيرتو الفنية، وقال بللي أنجح أغنية ديالو هي أغنية “ديدي”، واللي توزعات فأكثر من 40 دولة، وكانت مداخيلها، فاش خرجات، كبيرة بشكل خيالي.
وذكر بالمناسبة قصتو مع الطروفي اللي خداه من الهند بفضل نفس الأغنية لأنها انتاشرات وتباعت بزاف عند الهنود اللي عجباتهم، لدرجة أنها فاتت حتى إيرادات الألبوم الثامن ديال النجم العالمي الراحل مايكل جاكسون (Dangerous) فداك البلد الأسيوي، واللي كان خرج فنفس العام ديال إنتاج “ديدي” (1991).
وقالو بعض المتتبعين بأن معظم المعلومات اللي قالها الشاب خالد فبرنامج “مع الشريان” معروفة عند الجمهور ديالو، خصوصا فالمغرب والدزاير، ولكن فالمقابل أكيد أن فيها الجديد بالنسبة لباقي الجمهور فالمنطقة العربية.