مصطفى الشاذلي – كود //
حسب “ماگريب انتيليجانس” فان فوزي لقجع رئيس الجامعة الملكية المغربية لكرة القدم تسبب فازمة مغربية كاميرونية بسباب تنظيم كأس افريقيا للامم. وفق الجريدة نفسها فان باطرون الفيفا دجاني انفانتينو تحت ضغط الاندية الاوربية اللي عندها نجوم افريقية٬ بغات تأجل كأس افريقيا اللي غادية تنظم من 6 الى 31 يناير 2022 بالكاميرون٬ لكن رئيس الجامعة الكاميرونية للكورة النجم صامويل ايطو رفض.
وفق نفس الجريدة فان فوزي لقجع مع التأجيل فدخل فمواجهة مع ايطو وخدم بزاف بالكواليس ديال الكاف باش تأجل. هاد الشي وصل حتى لازمة مغربية كاميرونية تضيف الجريدة.
مصدر جامعي قال ل”كود” ان لقجع مع اكثر من 8 الاتحادات الافريقية كان مع مرعاة الوضعية الوبائية فتنظيم هاد الكأس وكان مع دعم المغرب والكاف لهاد الدولة فكاع الامور اللي بغاتها. المصدر قال ل”كود” “كان اتصالات بين ايطو ولقجع. تهادرو. فكرتو كانت انو مادام الاندية الاوربية علنات على رفضها تسرح اللعابة للمنتخب وحنا عندنا 24 لعاب الغالبية العظمى فهاد الاندية٬ دافع على مصالح المنتخب وحتى على مصالح الكاميرون.
حسب مصدر “كود” “لقجع ما هدرش على التأجيل. هدر على الوضعية القائمة بسباب الوباء”.
الفيفا كانت مع التأجيل. حتى فهاد النقطة رئيس الجامعة عضو المكتب التنفيدي للكاف والفيفا كان كيقول ما يمكنش تكون شي كأس افريقية فشي بلاد اخرى بلا ما تكونش فالكاميرون.
المصدر نفسو ل”كود” هاد الموقف ما تسببش فازمة مغربية كاميرونية. وذكر باللي باش كانت ايبولا واجل المغرب كأس افريقيا اللي كانت غادية تكون عندو٬ رئيس الكاف ديك الساعة: الكاميروني عيسى حياتو٬ وقف المنتخب المغربي عامين وعقوبة مالية كبيرة. الجامعة ديك الساعة مشات للمحكمة الرياضية الدولية “طاس” ولغات هاد الحكم.
المصدر قال ل”كود” “راه المغرب ما قالش ديك الساعة باللي الكاميرون ضد بلادنا. الجامعة واجهات عيسى حياتو وربحاتو”.
وحسب نفس المصدر ل”كود” فالاتصالات بين ايطو ولقجع كاينة وشرح ليه موقفو وما كانش مواجهة. كان رأي ضد رأي. هدرو على الوضع الوبائي
صامويل ايطو المعروف بمواقفو القوية ربح فهاد المعركة. ما رضاش ان الكان تتأجل حقاش الاندية الاوربية رافضة ومخلوعة من تنظيمها فالكاميرون.
رئيس الاتحاد الافريقي لكرة القدم الجنوب افريقي باتريك موتسيبي دعم ايطو. موقف رئيس الجامعة من التأجيل ما كانش غير ديالو كيف قلنا. الاتحاد المصري لكرة القدم بالاضافة الى اتحادات غينيا وبوركينا فاصو وموريتانيا ودول اخرى كانت مع التأجيل.
