كود – وكالات //

رسميا ولى نجم الكرة البرتغالي، كريستيانو رونالدو، أول لاعب فتاريخ كرة القدم كيوصل لـ800 هدف فالكاريير ديالو، بعدما ماركا جوج بيوت فالماتش ديال فرقتو مانشستر يونايتد مع أرسنال، الخميس 2 ديسمبر 2021، برسم الدورة 14 من الشامپيونا دالنكَليز، واللي سالا (الماتش) بـ3 لـ 2 لصالح صحاب رونالدو.

ووصل مجموع أهداف اللاعب البرتغالي فالفترتين اللي دوزهم مع “الشياطين الحمر” لـ130، وكان قبل ماركا 5 أهداف لسبورتينكَ لشبونة فبدايتو الاحترافية، و450 هدف لريال مدريد، و101 لجوفنتوس، و115 لمنتخب البرتغال.

وبالأرقام كيبقى كريستيانو رونالدو هو الهداف التاريخي ديال المنتخبات، والتشامبيونز ليكَ الأوروبية و ريال مدريد.

وقال الهداف التاريخي للبريميرليكَ، اللاعب الإنكَليزي السابق آلان شيرر، فشهادة مصورة دازت فـ پلاتفورم “أمازون پرايم”: “خاص الواحد يكَلس و يتمتع باللعب ديال كريستيانو و يتعجب، ويحييه على هاد الپيرفورمونس…”.

800th goal yes, the 800th of his career @Cristiano ???????????????????????????????????????????????????????????????????????????????? #MANARS

— Alan Shearer (@alanshearer) December 2, 2021