25/04/2024 21:30
في تقريرها السنوي.. أمنستي: استهداف المعارضين والناشطين الصحراويين في المغرب تزاد
كود كازا ///
علمت “كود” ان الفرقة الولائية بالدار البيضاء اعتقلات عادل اوري فقضية نصب . هاد الشخص كان دار شي حاجة اسمها “كنال 13” باش يغطي على انشطتو.
الشخص كان لغز كبير فقضايا كثيرة. ظهر فقضية القاضيين جعفر حسون وامغار. تشد فهاد القضية. كيفاش من بعد خرج ودار موقع؟ حتى هادا لغز اكبر.
من بعد تجبد فقضية النصب باسم الصحافة ديال مول “لونكيت” و”علاش تيفي”.
دابا ديك القضية خرجات فيها شي امرا كتاهمو باللي عرض عليها يجيب ليها العفو الملكي مقابل 80 مليون. حتى باش مشى عندو البوليس كان تايق باللي ما غاديش يتشد.
دابا بعد ايام دوزها فعكاشة بدات هدرة باللي لمرا اللي تاهماتو عطاتو تنازل. شوفو كيفاش كيتم الاستخفاف بالقضاء. ايلى هاد الشي بصاح خاص متابعة هاد لمرا. الدولة كلها من نيابة عامة وشرطة متطوعة للقيام بعملها وفالاخير تقول تنازل. علاش بعدا؟ على الابتزاز؟ على استخدام العفو الملكي؟
واخا تعطيه. القضية كبر منها. دابا كاينة جهات كدعمو باغية تخرجو. كتحميه.
دابا مع الدماء الجديدة فالمجلس الاعلى للسلطة القضائية سالاو ليه. رئيسها عبد البناوي خدام على اوراش كبيرة. للي كانو يعتاقدو محميين من شي جهات سالى وقتهم
المجلس الوطني للصحافة خاصو يدخل. كيفاش هادا كيهدر باسم الصحافة. كيفاش عندو ترخيص لموقعو. ايلي عندو بطاقة الصحافة هاديك كارثة اكبر. راه كانت عندو سوابق
