كود الرباط//

فضايح وزارة الصحة مكيساليوش، تتسالي فضيحة تتخرج ختها، حيث توصلت “كود” بوثائق جديدة تفيد بأن سعيد فكاك، رئيس مؤسسة الحسن الثاني للنهوض بالأعمال الاجتماعية للعاملين بالقطاع العمومي للصحة، عقد شراكة مع كروب عندو أندية رياضية في ثلاث مدن فقط، بأموال أكثر من 50 ألف موظف الذين يساهمون في مالية المؤسسة، ومن المال العام كذلك بحيث الدولة كتعطي سنويا منحة 5 ملايير سنتيم لهاد المؤسسة.

وقالت مصادر من إدارة مؤسسة الأعمال الاجتماعية، لـ”كود” إن “قرار الرئيس بمنح الأفضلية للموظفين المتواجدين فقط في فاس ومكناس وطنجة، يسيء للأهداف النبيلة للمؤسسة الاجتماعية، بحيث لا يعقل أن يساهم موظف من أكادير والرباط والعيون وزاكورة ليستفيد موظفون في فاس ومكناس وطنجة”.

والغريب هو أن فكاك دار شراكة مع كروب ADRIGYM لي عندو اندية رياضية متواجدة فقط في مدن مكناس وفاس وطنجة، يعني الموظفين المنخرطين فمؤسسة سعيد فكاك فباقي المدن المغربية غادين يخلصو على الموظفين ديال فاس ومكناس وطنجة، اللي بوحدهم غادي يستفدو من هاد الخدمة.

الشراكة للي خاصها تكون معممة باش جميع الموظفين يستفدو، دارها فكاك على مقاسو، هنا كتساءل مصادر “كود” :”واش مكاينيش شركات رياضية عندها صالات بجميع المدن؟ علاش بالضبط هاد الكروب لي دار معه الشراكة”.

فكاك كيترأس هاد المؤسسة لسنوات، بلا نتيجة الموظفين كيتشكاو من غياب الخدمات وعدم تفعيل هاد المؤسسة الاجتماعية، تعين سنة 2013 ف سياق وبقا ف نفس المنصب حيث دافع عليه حزبو التقدم والاشتراكية.