كود هناء ابو علي ///

ناصر بوريطة داير حملة فوسائل التواصل الاجتماعي مفادها: ما كاينش احسن وزير للخارجية منو وغادي يبقى فالحكومة. بوريطة كيقول للمغاربة راه غير انا اللي كاين فالديبلوماسية. هاد المغرور حد المرض بصورتو وبشخصيتو٬ طالع عن طريق ناسو٬ صفحات كتروج هاد الخزعبلات.

اجيو بعدا. فهاد الوقت شكون اللي ممكن يكون وزير خارجية المغرب؟ فاللول خاص التذكير باللي هاد البوسط اختصاص ملكي. اييه فالدستور يعين رئيس الدولة الوزير باقتراح من رئيس الحكومة٬ ولكن الامور واضحة. الديبلوماسية اختصاص ملكي. هادا ما فيهش نقاش. يعني اللي بغاه رئيس الدولة غادي يكون.

نرجعو على شكون ممكن يكون وزير خارجية مزيان للمغرب. نبداو بعمر هلال٬ ممثل المغرب في الامم المتحدة. كان سفير المغرب فبرلين وداز على جنيف وبان مزيان تماك. بان لدرجة برزط بوريطة اللي كان ديك الساعة كاتب عام لوزارة الخارجية.

لكن هلال غادي يبان ديبلوماسي مزيان فنيويورك. جاب للمغرب مكاسب كثيرة اللي كيحسبها ليه ناصر بوريطة. هاد الديبلوماسي كيعرف يختار الكلمات. كيعرف يضرب ويعرف مزيان وقتاش يضرب. يستحق يكون وزير خارجية

كاينة كريمة بنيعيش سفيرة المغرب الحالية في مدريد وقبلها كانت فلشبونة وكانت مديرة مديرية امريكا اللاتينية فالخارجية. بانت مزيان فالازمة المغربية الاسبانية. قليلة الكلام ولكن باش كتهدر كيكون كلامها فعال. كتخدم بزاف وكتحرك بزاف. كلشي للي فيها مناقض للي فهاد بوريطة. عزيز عليها الظل وباش تبغي تخرج كيكون حدث يستحق.

تعيينها رسالة مزيانة من بلادنا. غادية تكون اول وزيرة خارجية فتاريخ حكوماتنا. طبعا لكريمة بنيعيش اڤانطاج اخر وهو انها بنت لقصر لطبيعة العلاقة بين والدها الراحل والملك الحسن الثاني. يعني بنت المخزن ومجبدة وقافزة.

من اللي ممكن يكون احسن من بوريطة وبكثير هاد لوقيتة فهاد المنصب٬ كاين احد امهر الديبلوماسيين لمغاربة للي هو حسن ابو ايوب. وزير سابق سفير فباريس وروما ودابا فرومانيا. ذكي بزاف ومثقف كبير ومفاوض بارع. هاد الديبلوماسي خسارة للمغرب بهاد المناصب اللي عطاوه مؤخرا. بخلاف بوريطة٬ يتمتع ابو ايوب بشخصية قوية جدا. يمكن هاد الشخصية سبب مشاكلو. تلات بيه ليام وولى تلميذ غير نجيب بحال بوريطة٬ شاف عليه.

ابو ايوب سياسي. هو اكثر واحد فهادو للي ذكرنا عندو ثقافة سياسية. كيعرف المغرب. كيعرف الاحزاب. كيعرف التوازنات. كيعرف الاقتصاد. كيعرف لفلاحة من خلال مرورو من الفاو بروما. ايلى تعين المغرب غادي يهز النيفو بزاف فالديبلوماسية.

كاين يوسف العمراني اللي كان وزير منتدب للخارجية ايام كان بنعرفة هو وزير الخارجية فحكومة بنكيران الاولى. قبل كان كاتب عام للخارجية وبعد هاداك المنصب تكلف بمهمة فالديوان الملكي. اليوم هو سفير المغرب فجنوب افريقيا. هذا بحالو بحال عمر هلال٬ ديبلوماسي وتقنوقراط. حافظ ضواصا الخارجية وعندو ثقافة سياسية وعندو باگاج ديبلوماسي كبير.

العمراني خدام مزيان فجنوب افريقيا دابا. عودتو للخارجية منطقية خاصة انو كان دخل مع حزب الاستقلال اللي رجع دابا للحكومة.

هادي غير عينة من ناس غاديين يكونو فمنصب وزير خارجية المغرب احسن بكثير من هادا اللي كاين دابا. كاره النساء او اللي عزيز عليه المرأة المطيعة الديكور ماشي اللي تقول ليه اللا.