كود احمد الطيب الرباط ///

هادوك اللي كيديرو اقتراح اسماء للترشيح للانتخابات التشريعية فحزب العدالة والتنمية رشحو عبد الاله بنكيران رئيس الحكومة السابق والامين العام السابق للحزب٬ باش يكون ممثل حزبهم فدائرتو بسلا.

طبعا هاد الشي معمول بيه فالحزب. من بعد كاينة لجنة الترشيحات اللي كتحسم فالاسماء ولكن الاساسي فهاد الشي كولو هو موافقة المعني بالامر.

بنكيران ما غاديش يوافق على هاد الترشيح حسب من يعرفه لاسباب كثيرة٬ منها انه استقال من منصبه كنائب برلماني فهاد الولاية التشريعية اللي سالات٬ من غير هاد الشي وهادا هو الاهم ان المعني بالامر تعرض لضربات كثيرة وتهميش اكبر من القيادة الحالية للحزب. ترشيحو تزكية ماشي غير لحكومة بنعرفة اللي ما دار حتى حاجة باش يكون فهاداك المنصب٬ بل تزكية حتى لتدبيرو لشؤون الحزب.

بنكيران دار خرجات اكثر من مرة خاصة بعد التوقيع على اتفاق ابراهام مع اسرائيل واللي فيه اعترفات امريكا بمغربية الصحراء٬ ملخص هاد الخرجات٬ نتحاسبو مع القيادة الحالية حتى تسالي الولاية الحكومية. اي انو ما يمكنش يزكي هادو ايلى ترشح.

طبعا ماشي غير غادي يرفض يترشح بل مستبعد جدا انو يشارك فالحملة الانتخابية لحزبو. فالحقيقة ما عندها معنى يشارك فالدفاع على حصيلة هو كان من منتقديها. انتاقد التدبير السياسي والجبن السياسي والضعف التواصلي وامور كثيرة.