كود الرباط//
علمت “كود” من مصدر مطلع أن هيئة الأطباء (اللي مسيطر عليها لوبي الأطباء المرفحين) مشات عند شي برلمانيين باش يضغطو على الحكومة تبدل المواد ديال مشروع القانون المتعلق بمزاولة مهنة الطب، خصوصا المواد اللي كتهضر على الأطباء الاجانب والمستثمرين الأجانب فالصحة.
هاد اللوبي ديال الأطباء دار رسائل الحكومة اللي تجاهلتهم، حيث الحكومة عارفهم مزيان، مجاوبتهمش، ودبا مشاو عند بعض البرلمانيين باش يديرو البلوكاج لهاد المشروع.
طبعا قبل ما يمشيو عند البرلمانيين، دارو مجلس وطني وتحركو ودارو اتصالات كثيرة، حيث عارفين بلي هاد المشروع الجديد اللي جا في اطار تنزيل برنامج الحماية الاجتماعية اللي توقع أما أنظار الملك، غادي يقيس مصالحهم ويزيرهم شويا، وبالتالي غادي نشوفو منافسة قوية خصوصا فيما يتعلق بالاستثمار فالمصحات الخاصة.
هاد اللوبي ديال بعض الأطباء المرفحين الملايرين اللي دايرين ما بغاو فقطاع الصحة، خرجات عينها فالحكومة وكترفض قانون مزاولة الطب اللي كيمنح الحق للأطباء الأجانب يزاولو المهنة فالمغرب.
كولشي عارف الخصاص المهول في الموارد البشرية لقطاع الصحة، والذي قدر بـ”22 ألف طبيب و30 الف تقني، واش الدولة خصها تسنا رأي هاد الهيئة ودير ليها خاطرها عاد نفكو هاد الخصاص الخطير، الدولة خدات قرار مهم بزاف اللي غادي يفكك اللوبيات المتحكمة فالقطاع، يعني تحرير القطاع فهاد الوقت بزاف واخا تعطلنا فيه.
بالارقام، 70 في المائة من المغاربة كيتعالجو فالقطاع الخاص في حين يتكلف القطاع العام بـ30 في المائة، لذلك هادو غايكونو ضد هاد المشروع خصوصا فيه تحرير الاستثمارات وغادي يخليونا نشوفو طبيب مريكاني ولا سعودي ولا روسي ولا تركي يستثمر فزاكورة وطاطا وابي جعد واسا وغيرها من المناطق المهمشة، وممكن نشوفو خدمات زوينة بأثمنة مناسبة.
