كود الرباط//

عزيز اخنوش، وزير الفلاحة والصيد البحري والمياه والغابات، معطلش الرد على عبد اللطيف وهبي الامين العام لحزب البام، وجاوبو فالبرلمان بالقول :”كاين اللي كيزرع العمل وكاين اللي كيزرع الهضرة”.

وهبي دار اتهامات لوزارة الفلاحة والاطر ديالهم بلي كايديرو مشاريع فمناطق معينة حيث قربو الانتخابات، هادشي للي خلا اخنوش ينتفض ويقول بلي “الاطر خدامين وكنقوليهم زيدو خدمو”.

واوضح اخنوش :”المشاريع كاينة فجميع المناطق وجميع الجهات، وميمكنش شي واحد يقدر يوقف هاد المشاريع اللي غنبقاو خدامين عليهم تال آخر لحظة من عمر هذه الحكومة”.

وأضاف اخنوش، خلالة جلسة الاسئلة الشفوية بمجلس النواب، اليوم الاثنين، “كنبغي نشكر أطر وزارة الفلاحة والعاملين فالقطاع، اللي 14 عام وهوما كيشتغلو وهازين على كتافهم هاد القطاع”.

وتابع :”وكنبغي نقول لأطر الوزارة ميهمكم تا واحد، كملو فخدمتكم”.

وشدد اخنوش ؛”وبغيت نختم بالقول أنه كاين اللي فعادتو يزرع الكلام، وكاين اللي كيزرع الخدمة”.