كود كازا//

نهار على نهار الوضعية الوبائية دفيروس كورونا المستجد فالمغرب كتحسن، وهذشي اللي أكداو التصريح النصف شهري دوزارة الصحة حول الوباء، فالفترة الممتدة ما بين 16 فبراير حتى ل28 فبراير 2021.

بخصوص المنحى الوبائي الأسبوعي، قال عبد الكريم مزيان بلفقيه، رئيس قسم الأمراض السارية فوزارة الصحة، أننا سجلنا انخفاض ديال 6,8 فالمية بالمقارنة مع الأسبوع اللي فات، بحيث سجلنا 2499 إصابة مقابل 2681 بالمقارنة مع السيمانة اللي فاتت، وشمل هذ الانخفاض 5 جهات.

وكشف مزيان بلفقيه أن جميع المناطق فالمغرب تقريبا فيها اقل من 20 حالة لكل 100 ألف نسمة، باستثناء جزء صغير من جهة العيوس الساقية الحمرة بالإضافة لإقليم وجدة اللي عندهم من 20 حتى ل50.

وبالنسبة لمنحى الوفيات، فسجلنا انخفاض ديال 10,4 فالمية، بحيث ماتو هذ السيمانة 69، مقابل 77 ماتو السيمانة اللي فاتت.

بالنسبة لعدد الوفيات حسب الجهات، كتجي جهة كازا سطات فالمقدمة ب22 وفاة، بعدها جهة الشرق ب13، ثم جهة الرباط ب8، وجهة مراكش آسفي 7، وطنجة تطوان 6، وجهة سوس ماسة 5، وفاس مكناس 3 ودرعة تافيلالت 3، وبني ملال خنيفرة 2.

أما معدل الإصابة الأسبوعي لكل 100 ألف نسمة، فحقق انخفاض ل6,9 فالاسبوع الأخير، بينما كان محدد ف7,4 فالسيمانة اللي قبل.

وتسجل ارتفاع فعدد المرضى اللي كاينين فأقسام الإنعاش، بحيث فالجوج سيمانات اللخرين، دزنا من 433 حالة ل440 حالة.

وبخصوص مؤشر توالد الحالات على الصعيد الوطني فنهاية الأسابيع اللي فاتو، فبلغ ف24 يناير 0,90، و0,84 ف31 يناير، و0,91 ف7 فبراير، و0,85 ف14 فبراير، و0,92 ف21 فبراير، و0,98 ف28 فبراير.

وبالنسبة لترتيب المغرب عالميا، أكدات وزارة الصحة فنشرتها أن المغرب بقى فالرتبة 34 على مستوى الإصابات، كيف بقا فالرتبة 37 من ناحية الوفيات، والرتبة 42 فعدد الكشفات.

وعلى المستوى الإفريقي ترتيب المغرب ماتغيرش كذلك، بحيث باقي الثاني إفريقيا على مستوى الإصابات والكشوفات، والثالث فعدد الوفيات.