سهام البارودي – كود//

خرجت باش نتقدا فآخر نهار ف2020 فواحد من المتاجر الكبرى ، و كالعادة و فحال لي ماكايناش كورونا بزاف ديال الناس خارجين و كايتقداو ! الحلوى ! الموناضا ! الشكلاط ! شفت المغاربة من جميع الشرائح الاجتماعية نهار راس العام خارجين يتقداو لوازم الاحتفالات كولا على قد جيبو ! كاين لي شاري الحلوى من الباتيسريات الكبار بالدقة للنيف ! كاين لي شاري ديك الحلوة لي كاتوحل ليك مارگارين فاللها كايكون مكتوب فيها” Bon Anné “! و هادشي خلاني نسول راسي فيناهوما دوك لي كايغوتو فالفايسبوك ” راس العام حرام ” ” و تايصومو معانا رمضان عاد نحتافلو معاهم براس العام ” و دوك اللطميات الخاوية ديال كارهي الحب و السعادة و الافراح !

دخلت للفايسبوك لقيت الكتاني ( واحد من هادوك لي تشدو مورا احداث سطاش ماي الارهابية) حاط فيديو على الاحتفال براس العام و كونه حرام ! زدت سكروليت فالفايسبوك لقيت واحد الخبر نشراتو هيسبريس كايقول بلي التدين تراجع عند المغاربة و انه زاد اقبالهم على الحياة!هاد الهضرة لي ماحملوهاش الخوانجية و السلفيين و خرجو كايبكيو ” اه كيفاش زاد الاقبال على الحياة ؟! واش كاتبغيو تقولو بلي التدين كايمنع الاقبال على الحياة؟!

معلوم آ حنيني التدين بالمفهوم ديالكم راه كايمنع الانسان من الاستمتاع بالحياة! واش نتا لدين ديماك يصحابك الحياة هي تعمر براد ديال اتاي فالغابة و تصورو و تكتب ” التدين ليس هوا الابتعاد عن الحياة و لكن هوا الابتعاد عن الحرام ”

راه بزاف ديال الحوايج زوينين فالحياة كاتحرموهم ! علاش انك لاكنتي مرا تتبحري مع راسك بالدوبياس و تجلسي تبرونزاي ماشي قمة المتعة ؟! ايوا هاد المتعة البسيطة راكم محرمينها و كاتشوفوها فسق و فجور و كدا ! تخرج تسهر مع الاصدقاء و تشرب ما تيسر من الشراب متعة جميلة للناس لي كاتعرف تشرب و تتنعم و تضحك و تنشط … نتوما بالنسبة ليكم حرام ! الشيخات و القصاير و العراسات بالحيدوس و احواش و الجوق بالنسبة ليكم حرام واخا المغاربة كايلقاو فيها متعة ما بعدها متعة ! حتى الجنس لي متعة و حاجة زوينة فحياة الانسان درتو ليه عرام ديال الضوابط باش تبعدو الناس عليه !

راه گاع داكشي الزوين فالحياة كاتشوفوه نتوما حرام ! واخا تعياو ماتخبيو ! بولحية كايتصور كايلعب ماتش فالحمري و كايكتب ليك ” التدين ليس هوا الابتعاد عن الحياة” وا تا سييييييييراه ! الناس بغات تشطح ! تلوز ! تتصنط للموسيقى ! تعلق الغرامة للشيخات ! الشباب بغا يحضر ليكونصير ديال ليسطار العالميين و يغني معاهم تايبح صوتو ! بنادم بغا اللعاقة باش يشري الحديد المزيان و يطلق فيه الموسيقى و يشد طريق مراكش يدوز فيها شي قصارة نايضة ! الناس باغا تعيش و تحتافل براس العام و العيد الكبير و العيد الصغير و نويل و فين ماكاين الفرح و النشاط بسم الله !

و نتوما باغين تفرضو على عباد الله حتى كيفاش ينشطو ! “حلال” ! و كايقوليك ” ليس الابتعاد عن الحياة” وا خويا آشمن حياة هادي  لي مافيهش الشيخات و العلوة و الشطيح و التلواز و هاكا ديما عاشا سيدي محمد ! آشمن حياة لي مافيهاش با جدوب و يا شمس العشية ؟! آشمن حياة لي مانفوجو فيها فكبريات مانقصرو فيها مع صحابنا ؟! اشمن حياة لي الانسان مايتمتعش فيها بالدوخة الخفيفة ديال شي كاس د الويسكي و يتنغم مع راسو و هوا كايكركر بالضحك مع صحابو ؟!

نتا كاتبان ليك قمة السعادة فبراد ديال اتاي بالشيبة معمرو فشي غابة و لا فشي ماتش لاعبو مع ابو البراء و ابو انشاء و ابو هوندوفاء سوقك هاداك ! نتا باغي تكذب على راسك و تصنع واحد السعادة ” حلال” ! السعادة راه وحدة فالعالم كامل ماكايناش سعادة حلال و سعادة حرام ! كاينة سعادة وحدة و مفهوم واحد! السعادة لازدتي حداها شي لقب اخور عرف راسك راه غي كاتبرد على كغك !