محكمة فالصبليون برأت المتهمين فقضية لكسيدة اللي ماتو فيها 8 ديال المغاربة ف اسبانيا عام 2008
عفراء علوي محمدي- كود//
شرحات الفيدرالية البيمهنية لقطاع الدواجن بالمغرب للمواطنين علاش الثمن ديال الدجاج طلع فالسوق ل15 لدرهم للكيلو، وقالت أنها كتفهم تساؤلات المستهلك على الزيادة، لكنها كتطلب منو، فالمقابل يحس بمعاناة المربين اللي كاين بزاف منهم ضعفو انتاجهم حيت مابقاش ليهم وكاين اللي دارو فاييت.
وقالت الفيدرالية، فبلاغ ليها، أن المربين عاناو بزاف مع كورونا، من بعد ما سدو الريسطورات ولوطيلات والسويقات، والقطاع خسر 4 دالمليار درهم كلاو فيها المربين العصا كثر من أي حد آخر، خصوصا وأنهم تقصاو من دعم CNSS وبرامج “ضمان أكسجين” و”ضمان إقلاع”، وهذشي خلا الانتاج يضعاف ب40 فالمية.
وبشرات الفيدرالية المستهلكين بأن ثمن الدجاج الحي هبط لـ13 لدرهم، من بعد ما كان متفق رفع السعر ل15 لدرهم لمدة 10 أيام، واليوم نقص.
لكن فالمقابل، كشفات الفيدرالية أن هذ الوضع المتقلب فالأسعار غيستمر إلى ماتنفذاتش التدابير المبرمجة لتحديث قنوات تسويق وتوزيع الدواجن، وخصوصا إنشاء سوء الجملة للدواجن فكازا، وتفعيل الدعم من أجل عصرنة محلات الذبح التقليدية المعروفة بـ “الرياشات”، وتعزيز مراقبة المطاعم الجماعية فيما يتعلق بتزودها بلحوم الدواجن المعدة حصريا بالمجازر الصناعية.
والسبب الرئيسي اللي خلا الوضعية تتأزم فقطاع الدواجن هي تبعات فيروس كورونا المستجد، تدابير حالة الطوارئ الصحية أثرات، بشكل غير مسبوق عليه، وهذشي راجع لكون أن مجموعة من المطاعم والفنادق وقاعات الحفلات والأسواق الأسبوعية سدو، والطريطورات مابقاوش خدامين.