هند لكلاوي – كود طنجة ///

تفاصيل مروعة على فاجعة اغتصاب وقتل ودفن الطفل عدنان 11 سنة٬ نهار الاثنين 07 شتنبر 2020 فضواحي بني مكادة طريق الرباط بطنجة.

وفق معطيات حصرية حصلات عليها “كود” من افراد عائلة الطفل٬ فان عدنان كان خرج مع شي 3 و45 دقيقة العشية للصيدلية. كان لابس تي شورت نيوبالانس وداير كمامة بيضا. . جاب السخرة وطلعها للدار فين ساكنين بحي مارتيل٬ حطها وهبط. داز للحانوت اللي عند باه تحت الدار وخلى ليه شي اغراض: يمكن الهاتف ويمكن السوارت يشرح مصدر “كود”. مع الربعة قل شي دقايق كان مع القاتل ديالو. مول الفوقية والنظاظر واللي بان ما دايرش لكمامة.

الفرضية اللي كاينة دابا ان هاد المجرم القاتل ولد لقصر لكبير اللي ساكن فدار بعيدة ب3 زناقي على دار عدنان٬ كيعرفو. يعني ان هاد الحقير ربط معاه علاقة. ولف يشوفو. ترصد ليه لفترة. حتى جا الوقت اللي داز لجريمتو. يعني انو من المتوقع انو دار معاه وباش سالى السخرة من الصيدلية طلب منو يحط تلفونو وسوارتو. كان موجد الحقير للجريمة بكل تفاصيلها.

الاستدراج وفق مصدر “كود” من عائلة الطفل عدنان٬ كان فحدود الربعة عصرا. داه لدارو اللي كاينة كيف قلنا بعيدة 3 زناقي على دار الطفل. توقعت مصادر “كود” باش يكون اغتاصبو فحدود الربعة ونص. فحدود الخمسة قتلو. بدا يوجد باش يتخلص من الجثة٬ وفحدود الستة تقريبا وفق مصادر “كود” دفنو فشي حفرة فشي جردة قريبة من طريق الرباط.

الاب وفق مصادر “كود” انتبه لاختفاء ولدو. بدا يقلب فالساعات الاولى. السوارت والتلفون زادو شكوكو. وفق مصادر “كود” مشى حط شكاية عند البوليس على الساعة السابعة دالليل. من بعد طلق حملة على الفايس. فالدرب اللي فيه كاينين حوانت عندهم كاميرات. عطاوه الفيديو. هي باش خرجات من بعد صورة المجرم مع ولدو.

لكن علاش حتى الجمعة عاد تشد؟ وفق مصدر “كود” دائما من العائلة هاد المجرم باش شاف صورو وبعد ما حسن لحيتو وبدل شكلو٬ دار عملية اخرى باش ما يطيحش. وفق مصدر “كود”٬ المجرم الحقير رسل ام ام اس لبات عدنان. كيفاش لقى التلفون ديال الاب٬ وفق مصدر “كود” ساهلة حقاش الاب دارو فصفحة البحث عليه فالفايسبوك.  هاد الميساج فيه باللي الطفل مازال حي وباللي هو اللي ختاطفو وباللي طالب فدية.

هاد الشي دارو طبعا باش يربح الوقت ويغير مسار البحث ويقدر يهرب ويغبر.

اللي غريب ان صحابو اللي عايش معاهم شافوه ما بقاش ينعس وتصرفاتو تغيرات وما بلغوش عليه. شافوه قبل فالفايس وسكتو.