عفراء علوي محمدي- كود//

ردات مرات الفنان فريد غنام، اليوتوبورز المغربية رباب أزماني، على المتخلفين اللي انتقدوها بسبب لباسها فواحد الوصلة إشهارية دارتها مؤخرا على حسابها فأنستكًرام.

وقالت أزماني، بعدما بارطاجات بعض هذ التعليقات اللي كلها كره وحقد وسب وشتم: “واش أنا المفروض زعما ننتحر ملي نشوف هاذ التعليقات بالكيلو بالعكس كنزيد غير نحمد الله حيث ربي كتبلي نتربى فبيئة نقية وكبرت متصالحة مع نفسي…حيث لي كيقدر يكتب هادشي عندو عقدة نفسية ميؤوس من العلاج ديالها”.

وزادت أزماني “إحساسي الوحيد هو الشفقة على هاد الناس حيث معذبين فالدنيا وغيتعاذبوا حتى في الأخرة”.

وماشي غير أزماني اللي تعايرات فالتعليقات والبوسطات على مواقع التواصل الاجتماعي، اللي تنشرات فيها تصاورها على أوسع نطاق، المتخلفين عايرو حتى راجلها خيت خلاها تلبس هكذاك ووصفوه ب”الديوث”.

والعقلية الذكورية والرجعية مازال معشعشة فعقول بزاف ديال قلالين الوعي والتربية، كيجيب ليهم الله أن المرا مينور ومن الواجب على راجل يتحكم ليها فحياتها ولباسها وشنو تدير وشنو ماتديرش، فيحين أن المرا كائن مستقل من حقو يختار كيفاش يعيش حياتو بكل حرية وباستقلالية تامة على الرجل.