عفراء علوي محمدي- كود//

اليوم السلطات المحلية بمدينة صفرو سدات القهاوي اللي حدا الشلال، وخوات لابيسين التابع ليه من الما، باش مايعوم فيه حتى واحد، وهذشي بعدما سجلات المدينة ارتفاع كبير فعدد المصابين بفيروس كورونا المستجد فهذ الأيام الأخيرة.

والداخلية أصلا مانعة العومان فالمسابح ففترة الطوارئ الصحية، لكن المسبح التابع للشلال هو مسبح طبيعي، كيكب فيه الما من الشلال وكيمشي على واد أكَاي، اللي حتى هو صبحات السباحة فيه ممنوعة.

وعامل إقليم صفرو صدر هذ القرار باش مايعوموش الناس فالشلال والواد بعدما شاف ان الناس كايجيو ليهم بزاف وكيعومو فيهم فهذ الفترة اللي كتعرف ارتفاع فدرجة الحرارة.

وماشي غير صفرو اللي تمنع فيها العومان فالشلال والواد، لكن حتى السلطات المحلية فعمالة إقليم تطوان كانت صدرات قرار بمنع العومان فمنتجع “الزرقا” الطبيعي.

وجا هذ القرار بناء على محضر معاينة للجنة المختلطة للمسبح العمومي “الزرقا” بتاريخ 05 غشت 2020، لتفادي انتشار فيروس كورونا المستجد.